İstanbul Mahkemesi 97 Numaralı Sicil (H.1217-1225 / M. 1802-1810) cilt: 83, sayfa: 523 Hüküm no: 391 Orijinal metin no: [139b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Boş bulunan İstanbul Revgan-ı Şîr Kethudalığının Zülüflü Baltacı Halil’e verildiği Şîr-i revgan kethudâsı emri. Bâ-hatt-ı hümâyûn: “Mûcebince amel oluna.” Erbâb-ı istihkākdan hâssam zülüflüyân teberdârlarından işbu râfi‘-i tevkī‘-i refî‘ü’ş-şân-ı hâkānî, kıdvetü’l-emâsil ve’l-akrân Halil -zîde kadrühû- mübârek Rikâb-ı müstetâbıma arzuhâl sunup vazîfe-i mu‘ayyene ile İstanbul’da Revgan-ı Şîr Kethudâlığına bâ-mukābele-i nân mutasarrıf olan Ali teberdâr-ı zülüflüyân-ı hâssa fevt olup yeri hâlî kalmağla mahlûlünden bâ-mukābele-i nân kendine tevcîh ve yedine berat-ı âlî-şânım verilmek bâbında istid‘â-yı inâyet etmeğin şeref-yâfte-i sudûr olan hatt-ı hümâyûn-ı şevket-makrûnum mûcebince kethudâlık-ı mezkûr mahlûlünden mûmâ-ileyhe tevcîh olunmak fermânım olmağın hakkında mezîd inâyet-i Pâdişâhânem zuhûra getirip bin iki yüz yirmi beş senesi Saferü’l-hayr’ın yirmi birinci günü târihiyle müverrah verilen ruûs-ı hümâyûnum mûcebince bu berat-ı hümâyûn-ı mehâbet-makrûnu verdim ve buyurdum ki: Mûmâ-ileyh Halil teberdâr-ı zülüflüyân-ı hâssam -zîde kadrühû- varıp müteveffâ-yı merkūmun mahlûlünden kethudâlık-ı mezkûra bâ-mukābele-i nân mutasarrıf olup hizmet-i lâzımesin mer‘î ve müeddâ kılındıkdan sonra bundan evvel kethudâlık-ı mezkûra mutasarrıf olanlar vazîfe-i mu‘ayyenesine ne vechile mutasarrıf olagelmişler ise mûmâ-ileyh dahi ol vechile vazîfe-i mu‘ayyenesin alıp mutasarrıf olup devam-ı ömr ü devlet-i şehin-şâhânem ed‘iyesine muvâzabet ve iştigāl üzere ola. Şöyle bileler; alâmet-i şerîfe i‘timâd kılalar. Fî 26 S sene 1225