İstanbul Mahkemesi 97 Numaralı Sicil (H.1217-1225 / M. 1802-1810) cilt: 83, sayfa: 534 Hüküm no: 397 Orijinal metin no: [142b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Boş bulunan İstanbul Yoğurtçular Kethudalığının Zülüflü Baltacı Ahmed’e verildiği Yoğurtcular kethudâsı emri. Bâ-hat. “Mûcebince amel oluna.” Teberdâr-ı zülüfiyân-ı hâssamdan ve erbâb-ı istihkākdan işbu râfi‘-i tevkī‘-i refî‘ü’ş-şân-ı hâkānî kıdvetü’l-emâcid ve’l-a‘yân Ahmed -zîde mecduhû- mübârek [Rikâb-ı] müstetâbıma arzuhâl sunup yoğurtcuyân-ı İstanbul ve Eyüp ve Üsküdar kethudâlığına bilâ-ta‘yîn bâ-mukābele-i nân mutasarrıf olan Osman Halîfe an-teberdârân-ı hâssa fevt olup yeri hâlî kalmağla mahlûlünden bâ-mukābele-i nân kendine tevcîh ve yedine berat-ı âlî-şânım verilmek bâbında istid‘â-yı inâyet etmeğin şeref-yâfte-i sudûr eden hatt-ı hümâyûn-ı şevket-makrûnum mûcebince kethudâlık-ı mezbûr müteveffâ-yı merkūmun mahlûlünden mûmâ-ileyh Ahmed -zîde mecduhû-ya tevcîh olunmak fermânım olmağın hakkında mezîd-i inâyet-i pâdişâhânem zuhûra getirip bin iki yüz yirmi beş senesi Rebî‘ülevvelinin onuncu günü târihiyle müverrah verilen ruûs-ı hümâyûnum mûcebince bu berat-ı hümâyûn-ı inâyet-makrûnu verdim ve Buyu[r]dum ki: Mûmâ-ileyh Ahmed teberdâr-ı zülüfiyân-ı hâssa -zîde mecduhû- varıp müteveffâ-yı mezbûrun mahlûlünden kethudâlık-ı mezkûra bâ-mukābele-i nân bilâ-ta‘yîn mutasarrıf olup hizmet-i lâzımesin bî-kusûr mer‘î ve müeddâ kıldıkdan sonra işbu berat-ı âlî-şânıma mugāyir kethudâlığı umûruna hiç ferd mâni‘ ve müzâhim olmayıp dahl ve ta‘arruz kılmayalar. Şöyle bileler; alâmet-i şerîfe i‘timâd kılalar. Fî 7 Rebî‘ülevvel sene 1225 Kostantıniyyeti’l-mahrûse