İstanbul Mahkemesi 97 Numaralı Sicil (H.1217-1225 / M. 1802-1810) cilt: 83, sayfa: 535 Hüküm no: 398 Orijinal metin no: [142b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İstanbul’daki ekmekçi esnafının ve nizam ustalarının nizamı Habbâzlara müte‘allik emir. Sah. İstanbul Kādısı Fazîletlü Efendi Habbâz esnâfı sâir esnâfa makīs olmayıp maslahatları ibâdullâhın akvât-ı yevmiyelerini idâreden ibâret olduğuna mebnî esnâf-ı mezkûrenin kethudâ ve yiğitbaşılarından mâ‘adâ temşiyet-i umûrları on iki nefer nizâm ustalarına münhasır olup işbu nizâm ustaları müntehab ve mücerreb olmak ve esnâfdan ba‘zı ashâb-ı ağrâzın ihbârlarıyla ihrâc ve idhâlleri tecvîz olunmayıp hasbe’l-hâl ihrâc ve idhâlleri iktizâ eyledikde beher hâl İstanbul Kādısı ve Kapan nâibi bulunanların re’y ve ma‘rifetleri munzam olmak ve nizâm ustası olanlar dahi esnâfı bir tutup nizâmât-ı umûrlarında hakkāniyet üzere hareket ve hilâfından mücânebet ve masâlih-ı esnâfı lâyıkı üzere rü’yet ve iktizâsına [143a] göre mahâlline arz ve ifâde etmek ve esnâfdan garaz ve nefsâniyete mebnî cânı isteyen kimesneler yanlarına birkaç kimesne dahi uydurup Bâb-ı Âlî ve mahâll-i sâireyi beyhûde ta‘cîz etmemek ve mesûlâtları her ne ise kethudâları ve nizâm ustaları ma‘rifetleriyle bi’l-ifâde görülmek ve bu nizâm ustaları esnâfın müntehab ve mümtâzlarından olduğuna mebnî münâsib olan mesûlâtlarına müsâ‘ade olunmak usûl-i nizâmlarından iken bir müddetden beri dikkat olunmadığından refte refte ravâbıt-ı nizâmiyeleri münhal olarak Kapan’da olan dâd ü sitedlerinde ve mîrî anbârlarından aldıkları tevzî‘ât-ı mu‘tâdelerinde hasârete cesâretleri zâhir olmağın ba‘d-ezîn ravâbıt-ı nizâmiyelerinin tahkîmi lâzımeden olmağla fîmâ-ba‘d esnâf-ı merkūmenin nizâmât-ı mezkûrelerine kemâliyle ri‘âyet ve aldıkları tevzî‘âtda şemâtet ve perde-bîrûn hareket ile hasârete cesâret ve deyn-i mîrîlerini ve tüccâr mâllarını edâda te‘allül ve muhâlefet eylememeleri tenbîh ve mütenebbih olmayanları olur ise kethudâ ve nizâm ustaları ihbârlarıyla tedîb olunmak ve kethudâ ve nizâm ustaları dahi esnâf-ı merkūme içinde ashâb-ı ağrâz ve sâ‘î-i tezvîrât olanlarını setr ve muhâfaza etmeyip esnâfca loncalarında terbiye ve tenbîh, kabûl etmezler ise ihbâr eylemek üzere râbıta-i kaviyyeye bend ve İstanbul Mahkemesi ve Kapan sicillâtına kayd ile ale’d-devam muktezâsının icrâsı ve hilâfı hâlât vukū‘a gelmemesi husûsuna ihtimâm eyleyesiz deyü. Fî 20 R sene 1225