İstanbul Mahkemesi 97 Numaralı Sicil (H.1217-1225 / M. 1802-1810) cilt: 83, sayfa: 536 Hüküm no: 399 Orijinal metin no: [143a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sofçu Gümüşgerdanoğlu’nun borçlarının, tek seferde ödeyemeyeceği hukuken sabit olur ise taksitlendirilmesi Sarrâf Gümüşgerdanoğlu’nun fermânı. Akzâ kuzâtü’l-Müslimîn, evlâ vülâti’l-muvahhidîn, ma‘denü’l-fazli ve’l-yakīn, râfi‘u a‘lâmi’ş-şerî‘ati ve’d-dîn, vârisü ulûmü’l-enbiyâi ve’l-mürselîn, el-muhtassu bi-mezîd-i inâyeti’l-Meliki’l-mu‘în mevlânâ İstanbul Kādısı -zîdet fezâilühû- tevkī‘-i refî‘-i hümâyûn vâsıl olucak ma‘lûm ola ki Âsitâne-i aliyyemde Sofcular Hanı’nda mütemekkin Sofcu Gümüşgerdanoğlu nâm zimmî Rikâb-ı hümâyûnuma arzuhâl edip mesfûrun Âsitâne-i aliyyemde sâkin ma‘lûmü’l-ism kimesnelere yirmi beş bin yedi yüz altmış bir guruş deyni olup ancak def‘aten edâya kudreti olmayıp taksît-ı şer‘î ile edâya râzı iken mezkûrlar kemâl-i te‘annüdlerinden nâşî def‘aten taleb ve ahz ü habs teklîfi ile te‘addî ve rencîdeden hâlî olmadıkların ve Mahmudpaşa Nâibi tarafından yedine i‘lâm-ı şer‘î i‘tâ olunduğun inhâ ve şer‘le görülüp taksît-ı şer‘î ile edâ-i deyn ettirilmek bâbında hükm-i hümâyûnum ricâ etmekden nâşî Dîvân-ı Hümâyûn’umdan şurûtu suâl olundukda; bu makūle def‘aten edâ-i deyne adem-i kudreti, dâyinleri muvâcehesinde sâbit olan medyûnun taksît-ı şer‘î ile edâ-i deyn eylemesi için emr-i şerîf yazılageldiği tahrîr olunmağla şurûtu mûcebince amel olunmak bâbında fermân-ı âlî-şânım sâdır olmuşdur. Buyurdum ki: Hükm-i şerîfimle ( ) vusûl buldukda bu bâbda sâdır olan emrim üzere amel dahi sen ki Mevlânâ-yı mûmâ-ileyhsin, husûs-ı mezbûra tamam mukayyed olup göresin inhâ olduğu üzere mesfûrun ber-vech-i muharrer dâyinleri merkūmûna deyni olan ol mikdâr guruşu def‘aten edâya adem-i kudreti dâyinleri merkūmûn muvâcehelerinde şer‘an sâbit olur ise taksît-ı şer‘î ile edâ-i deyn ettirip def‘aten taleb ve ahz ü habs teklîfi ile te‘addî ve rencîde ettirmeyip mazmûn-ı emr-i şerîfimle âmil olasız. Şöyle bilesiz alâmet-i şerîfe i‘timâd kılasız. Fî-evâsıtı Rebî‘ülâhir sene 1225 Kostantıniyyeti’l-mah[mi]yye