İstanbul Mahkemesi 97 Numaralı Sicil (H.1217-1225 / M. 1802-1810) cilt: 83, sayfa: 537 Hüküm no: 401 Orijinal metin no: [143a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ordu ile birlikte sefere gidiyormuş gibi silahlanıp halka zulmedenlerin engellenmesi İstanbul Kādısı Fazîletlü Efendi Ordu-yı hümâyûn-ı nusret-makrûn-ı şâhâne için bundan akdemce ihrâc olunan neferât ile ba‘zı nefs ü hevâsına tâbi‘ eşhâs makūlesi icrâ-yı garaz zımnında neferât-ı mezkûre ile sefer[e] gidercesine silâhlanıp ehl-i İslâm ve re‘âyâya tetâvül-i dest-i te‘addî ile ızrâr kasdetmişler iken şimdi bi-mennihî te‘âlâ yeniçeri neferâtı ordu-yı hümâyûna azîmet edip bu makūleler avdet ve silâhlarını çıkarıp ehl-i ırz kıyâfetine girerek kabâhatini setr dâ‘iyesinde oldukları ve bunlar misillü hilâf-ı şer‘-i şerîf hareket edenlerin tedîblerinde tekâsül ve rehâvet eylemek gayr-ı câiz idiği ve bunları tedîb ile sâir ehl-i ırz gürûhunu te’mîn vâcibât-ı umûrdan olduğu zâhir olmağla imdi bi’l-cümle mahallât imâmlarını nezdinize ihzâr birle her bir mahallenin imâmına mahallelerinde o makūle sefer-i hümâyûna gitmek üzere hazırlanıp ba‘dehû ihtifâ etmiş eşhâs var ise hafî ve celî taharrî ve tahkīk ederek bilâ-te’hîr tarafınıza ihbâr eylemelerini muhkem tenbîh ve te’kîd birle tarafınıza ihbâr olunan eşhâsı isim ve şöhret ve mahallesinin ismi tasrîhıyla defter ettirip defter-i mezkûru huzûrumuza takdîme mübâderet eyleyesiz deyü. Fî 27 Rebî‘ülâhir sene 1225