İstanbul Mahkemesi 97 Numaralı Sicil (H.1217-1225 / M. 1802-1810) cilt: 83, sayfa: 538 Hüküm no: 402 Orijinal metin no: [143b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Avrupa tüccarından Sakızlı Cani Petro v. İstrati ve ortağı Yani v. Nikola’nın borçlarının, tek seferde ödeyemeyecekleri hukuken sabit olur ise taksitlendirilmesi Sakızlı Cani Petro zimmînin taksît emri. Akzâ kuzâtü’l-Müslimîn, evlâ vülâti’l-muvahhidîn, ma‘denü’l-fazli ve’l-yakīn, râfi‘u a‘lâmi’ş-şerî‘ati ve’d-dîn, vârisü ulûmü’l-enbiyâi ve’l-mürselîn, el-muhtassu bi-mezîd-i inâyeti’l-Meliki’l-mu‘în mevlânâ İstanbul Kādısı -zîdet fezâilühû- tevkī‘-i refî‘-i hümâyûn vâsıl olucak ma‘lûm ola ki Re‘âyâ-yı Devlet-i aliyyemden ve Avrupa tüccârından Dersa‘âdet’imde Vâlide Hanı’nda mütemekkin Sakızlı Cani Petro v. İstrati ve şerîki Yani v. Nikola nâm tâcirlerin Rikâb-ı hümâyûnuma takdîm eyledikleri bir kıt‘a arzuhâllerinde mersûmân bir müddetden beri şirket-i inân ile şerîkler olup lâkin bi-kazâillâhi te‘âlâ kazâ-zede olup medyûn olmalarıyla mal-ı mevcûdları dâyinleri olan Avrupa tüccârından ve sâirden ma‘lûmü’l-esâmî ( ) kimesnelere vâfî olmadığından taksît ve tecîl ile edâ-yı deyne râzılar iken dâyinlerinden ba‘zı kimesneler def‘aten taleb ve ahz ü habs teklîfiyle te‘addî ve rencîdeden hâlî olmadıkların inhâ ve dâyinleri olanların def‘aten taleb ve ahz ü habs teklîfiyle vâki‘ olan te‘addîleri men‘ u def‘ olunmak bâbında emr-i şerîfim sudûrunu istid‘â etmeleriyle vech-i meşrûh üzere amel olunmak fermânım olmağın imdi sen ki mevlânâ-yı mûmâ-ileyhsin, husûs-ı mezbûr inhâ olunduğu üzere mersûmânın def‘aten edâ-yı deyne adem-i kudretleri dâyinleri muvâcehelerinde şer‘an sâbit ve zâhir olur ise taksît-ı şer‘î ve tedrîc ile ber-mûceb-i şurût edâ-yı deyn ettirip def‘aten taleb ve ahz ü habs teklîfi ile te‘addî ve rencîde ettirmeyip men‘ u def‘ olunmak bâbında fermân-ı âlî-şânım sâdır olmuşdur. Buyurdum ki: Hükm-i şerîfimle vusûl buldukda bu bâbda vech-i meşrûh üzere şeref-yâfte-i sudûr olan fermân-ı vâcibü’l-ittibâ‘ ve lâzımü’l-imtisâlimin mazmûn-ı itâ‘at-makrûnuyla amel ve hareket ve hilâfından mübâ‘adet eyleyesin. Şöyle bilesin alâmet-i şerîfe i‘timâd kılasın. Tahrîren fî-evâhiri şehri Rebî‘ülâhir sene 1225 Kostantıniyyeti’l-mahrûse