İstanbul Mahkemesi 97 Numaralı Sicil (H.1217-1225 / M. 1802-1810) cilt: 83, sayfa: 545 Hüküm no: 408 Orijinal metin no: [145a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Osmanlı ülkesine saldıran Rusya’ya karşı seferberlik ilan edildiğinden, Müslümanların, hazırlanacak ordu için imkânları ölçüsünde maddi destekte bulunması Sefer emri. Sah. İstanbul Kādısı Fazîletlü Efendi El-hâletü-hâzihî dînimizin düşmanı olan Moskov keferesinin Şumnu ve Varna ve dahi berilere gelmekde olduğu ve menviyy-i zamîri ne idiği cümlenin ma‘lûmudur. Küffâr-ı hâk-sâr asâkir-i külliyye ve tedârükât-ı kaviyye ile her tarafa yürüdüğünden başka gayret-i İslâmiye tahammül etmez teklîfler edip eğer îrâd eylediği tekâlîf-i şâkka kabûl [145b] olunmaz ise İstanbul kapısına varırım deyü mağrûrâne cevâba ibtidâr eylediğine mebnî sudûr eden hatt-ı şerîf-i şâhâne mûcebince Ebulfeth Sultân Mehmed Hân-ı Gāzi Câmi‘-i şerîfinde cümle ile akd-i meclis-i meşveret birle müsta‘înen billâhi te‘âlâ livâ-i sa‘âdet sâyesiyle bi’n-nefs sefer-i nusret-esere azîmet-i hümâyûna karâr verilerek Anadolu ve Rumeli’den nef[î]r-i âmm ile yedi yaşından yukarısı sefere gelmek üzere evâmir neşrolunup ancak beytü’l-mâl-i Müslimînde nukūd mefkūd olarak muzâyaka derkâr olduğuna binâen fî-sebîlillâh cihâd için herkes hâllerine göre rızâlarıyla cânib-i beytü’l-mâle i‘ânet eylemek şer‘an lâzım gelmeğin ehl-i İslâmdan kavî-kudret olanların rızâlarıyla hâllerine göre cânib-i beytü’l-mâle imdâd eylemeleri husûsuna cevâz-ı şer‘î dahi derkâr olmağla imdi dîn-i mübîne hizmet cümle ehl-i îmâna lâzıme-i zimmet-i diyânet idiğini ifâde ve i‘lân eyleyerek ashâb-ı servet ve yesâr ve erbâb-ı iktidârın cebir ve tazyîk olunmayarak hüsn-i rızâ ve tîb-ı ihtiyârlarıyla sîmi olanların sîm ve akçesi olanlar akçesini meccânen Darbhâne’ye teslîm birle herkes vüs‘at-i mâlına ve kuvvet-i diyânetine göre kudreti derece, verilen fetvâ-yı şerîfe mûcebince tanzîm-i mühimmât-ı harbiye zımnında beytü’l-mâl-i Müslimîne imdâd ve i‘ânet ile zümre-i mücâhidînden olmaklığa ve bu vechile dînimize bir hizmet-i hasene ibrâzıyla dâreyn sa‘âdetini tahsîle sarf-ı makdûr eylemelerini iktizâsı üzere i‘lân ve ifâde etmek husûsunu eimme-i mahallâta tenbîh ve te’kîde mübâderet eyleyesiz deyü. Fî 28 Ca sene 1225