İstanbul Mahkemesi 97 Numaralı Sicil (H.1217-1225 / M. 1802-1810) cilt: 83, sayfa: 559 Hüküm no: 421 Orijinal metin no: [149a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kemal Paşa Mescidi Vakfı gelirlerinden, Kemalpaşa Mahallesi’nin avarız vergisi için 24 kuruş tahsisine dair vakfiyeye yapılan zeyl hakkındaki ilmühaberin İstanbul Mahkemesi siciline kaydedilmesi Cizye Muhâsebesi Kîsedârı Efendi’nin vakfiyesinin kaydı ilmühaberi. İstanbul’da Kırkdörtkapısı kurbünde Kemâlpaşa Mescid-i şerîfini minber vaz‘ ve câmi‘ eyleyen ashâb-ı hayrâtdan Cizye muhâsebesi kîsedârı Mehmed Selim Efendi b. Mehmed Necib Efendi’nin bu def‘a Rikâb-ı hümâyûna memhûren takdîm eylediği bir kıt‘a arzuhâli mefhûmunda ber-mûceb-i vakfiye-i ma‘mûlün-bihâ vâkıfı olduğu vakfının gallâtından beher sene Kemâlpaşa mahallesi avârızı için yirmi dört guruş vakf-ı mezbûr mütevellîleri yedinden ahz ü kabz ve fazîletlü İstanbul kādîları efendiler mahkemelerine îsâl ve irsâlini şart ve ta‘yîn eylediğine binâen meblağ-ı mezbûr beher sene vakfının mütevellîleri yedlerinden ahz ü kabz ve Kādî-ı müşârün-ileyh Mahkemesi’ne îsâl ve irsâl olunması husûsu kaleminde mukayyed vakfiye-i ma‘mûlün-bihâsı zeyline sebt ü kayd ve iktizâ eden mahallere ilmühaberi verilmesi için i‘lâm olunmasını hâvî Haremeynü’ş-şerîfeyn Müfettişi Efendi’ye havâle buyurulmasını istid‘â etmekden nâşî “Avârız vakfının Anadolu Muhâsebesi’ne kaydının ihticâca salâhiyeti var mıdır, görüp i‘lâm eyleyesiz” deyü müfettiş-i mûmâ-ileyhe hitâben şeref-rîz-i sudûr olan fermân-ı âlîye imtisâlen İstanbul’da Bâb-ı Defterî’de kâin Cizye muhâsebesi kalemi kîsedârı olan bâ‘isü’l-hayrât ve’l-hasenât sahib-i arzuhâl es-Seyyid Mehmed Selim Efendi b. Mehmed Necib’in yedinde olup müfettiş-i mûmâ-ileyhin imzâ ve hatmini hâviye İstanbul’da Şehzâde Câmi‘-i şerîfi kurbünde vâki‘ Kemâlpaşa mahallesi avârızı için Vakf-ı şerîfi gallâtından beher sene yirmi dört guruş ihrâc ve mahâlline irsâl olunmak için Vakf-ı mezbûr mütevellîleri yediyle fazîletlü İstanbul kādîları efendiler mahkemesine kabzına me’mûr olan muhzırân kethudâsına teslîm olunmak üzere şart ve ta‘yîn edip vâkıfı ve bi’l-meşrûta mütevellîsi olduğu bir kıt‘a teksîr-i îrâd ve tevfîr-i masârif [149b] vakfiye-i ma‘mûlün-bihâsına mine’l-mebde’ ile’l-makta‘ kemâl-i dikkat ve taharrî üzere nazar olundukda, mazmûnu min-külli’l-vücûh muvâfık ve mutâbık-ı şer‘-i şerîf ve kayd ve ihticâca salâhiyeti olup lâkin aklâmın birinde kaydı olmamağla vakfiye-i mezkûre Muhâsebe-i merkūmede mukayyed sâir vakfiyesi mahâlline sebt ü kayd ve İstanbul kādîları efendiler Mahkemesi’ne ilmühaberi verilip vakfiye-i mezkûre yine yedinde ibkā buyurulması niyâzıyla vâkıf-ı mûmâ-ileyh es-Seyyid Mehmed Selim Efendi’nin istid‘â-yı inâyet eylediğini müfettiş-i mûmâ-ileyh es-Seyyid Mehmed Zeki Efendi i‘lâm etmeğin imdi i‘lâmı mûcebince vakfiye-i mezkûre Muhâsebe-i merkūmeye kaydolunup ilmühaberi i‘tâsıyla vakfiye-i mezkûre yedinde ibkā olunmak bâbında fî 16 Receb sene 1225 târihiyle müverrah sâdır olan fermân-ı âlî mantûkunca vakfiye-i mezkûre Muhâsebe-i mezkûrede mukayyed vâkıf-ı mûmâ-ileyhin sâir vakfiyesi zeyline sebt ü kaydolunmağla vech-i meşrûh üzere Kādı-ı müşârün-ileyhin Mahkemesi sicillâtına li-ecli’l-kayd işbu ilmühaber kāimesi verildi. Tahrîr[en] fi’t-târîhi [metinde “fi’t-tahrîri”]’l-mezbûr.