İstanbul Mahkemesi 97 Numaralı Sicil (H.1217-1225 / M. 1802-1810) cilt: 83, sayfa: 560 Hüküm no: 422 Orijinal metin no: [149b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Çeşitli cins altın paraların kesilip eksiltilerek dışarıya gönderilmemesi, eksik altının alınıp verilmemesi, kesme fiilini işleyenlerin, elinde bu gibi eksik altın bulunanlardan zincirleme soruşturulmak suretiyle ortaya çıkarılıp cezalandırılacağı Altın men‘i. Bâ-sah. İstanbul Kādısı Fazîletlü Efendi Sikke-i hasene-i şâhâne ve düvel sikkeleriyle meskûk ecnâs altının tâmmü’l-vezn olarak eyâdî-i nâsda tedâvülüyle nâkıs altının revâcdan men‘i irâde-i kātı‘a muktezâsından iken bir müddetden beri ba‘zı erbâb-ı tama‘ ve irtikâb tâmmü’l-vezn altınları kat‘ ve tenkīsa fürce-yâb olarak peyder pey taşra memâlikine nâkıs altın irsâline ictisâr üzere oldukları tahkīk olunmakdan nâşî fîmâ-ba‘d Bâb-ı Âlî’den ve Darbhâne-i âmire taraflarından adamlar ta‘yîniyle bu kâr-ı mekrûha cesâret edenler ahz ü girift olunarak icrâ-yı cezâ-yı mâ-yelîklarına mübâderet olunmasına irâde-i aliyye ta‘alluk etmekle imdi bu yasak sâir yasaklara makīs olmayıp nâkıs altın külliyen revâcdan men‘ olunduğunu ve her kimin yedinde nâkıs altın var ise evvel-emirde ortasından şak ve Darbhâne-i âmireye teslîm ile kıymetine göre sağ akçeye tebdîl eylemeniz ve bundan sonra nâkıs altın kimesne yedinde bulunmayıp hilâf-ı fermân vaz‘ ve hâlet vukū‘a gelmemesini ve kimin yedinde eksik altın bulunur ise kimden aldığı ve aldığı adam dahi kimden almış olduğu tahkīk olunarak kat‘ı kime dayanır ise ahz ve bilâ-emân tertîb-i cezâ kılınacağını eimme-i mahallât ve esnâf kethudâlarına ifâde ve tefhîm birle bi’l-cümle esnâf ve tüccâr birbirlerine tekeffül ve kethudâ ve yiğitbaşılarına ta‘ahhüd ettirtilerek nizâma rabt ve sûret-i nizâmının huzûrumuza arz ve i‘lâm olunması husûsuna mübâderet eyleyesin deyü. Fî 25 Recebi’l-ferd sene 1225