İstanbul Mahkemesi 97 Numaralı Sicil (H.1217-1225 / M. 1802-1810) cilt: 83, sayfa: 560 Hüküm no: 423 Orijinal metin no: [149b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Padişah, Valide Sultan ve haremi için tedâriki gereken 69 çift talimli beygir ve arabacılarının bir an önce hazırlanması Matlûb olan araba bargirleri. Bâ-sah. İstanbul Kādısı Fazîletlü Efendi Mevkib-i hümâyûn-ı şâhâne ve Mehd-i ulyâ-yı saltanat ve harem-i hümâyûn lâzımeleri için Dersa‘âdet’de vâki‘ koçı arabacılarından matlûb olan seksen kıt‘a Sirem arabalarının tedârükünde usret derkâr olduğuna mebnî zikrolunan arabalara bedel altmış dokuz çift mu‘allem araba bargirleriyle iktizâ eden arabacıları tedârük ve i‘tâya koçaş [metinde “kocac”] esnâfı kethudâsı ve sâir ustaları müte‘ahhid olmuşlar ise de mevkib-i hümâyûn-ı pâdişâhînin bi-mennihî te‘âlâ nehdat ve hareketi be-gāyet takarrub etmekden nâşî matlûb olan mezkûru’l-mikdâr mu‘allem ve tüvânâ araba bargirleriyle lâzım gelen arabacıların ber-mûceb-i ta‘ahhüd bir sâ‘at akdem tedârük ve tanzîm birle i‘tâsı husûsuna mübâderet olunması lâzımeden olmağla imdi esnâf-ı merkūme kethudâlarını huzûrunuza celb ile müte‘ahhid oldukları vechile mezkûru’l-mikdâr çift mu‘allem ve tüvânâ araba bargirleri ve arabacılarının bir kadem akdem tedârük ve tehiyye ve hazır u âmâde birle Hâssa Arabacıları Kışlası nâzırı Mirâhur-ı sânî-i hazret-i şehriyârî Süleyman Bey’e teslîm eylemelerini esnâf-ı merkūmeye muhkem tenbîh ve te’kîd olunarak tekrar sûret-i ta‘ahhüdlerini huzûrumuza i‘lâma mübâderet eyleyesiz deyü. Fî-selhi Receb sene 1225