İstanbul Mahkemesi 137 Numaralı Sicil (H.1236-1238 / M 1821-1822) cilt: 86, sayfa: 58 Hüküm no: 9 Orijinal metin no: [2a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sultan Abdülhamid Han vakfından icâreli, Yedikule’deki kasap dükkânı gediğinin yarım hissesinin Hüseyin b. Hasan’ın vefâtı üzerine, Osman Ağa’ya devredilmesi Mahlûlden nısf selhhâne îcârı inhâsı Ma‘rûz[-ı dâ‘î-i devlet-i aliyyeleridir ki] Hüdâvendigâr-ı esbak cennet-mekân firdevs-âşiyân merhûm ve mağfûrun-leh Sultan Abdülhamid Hân -tâbe serâhu- hazretlerinin Yedikule hâricinde vâki‘ gayr-ez selhhâne-i mîrî on aded ganem selhhânelerinden yedinci selhhâneye merbût mahrûse-i Galata’da Yenicâmi‘-i şerîf civârında vâki‘ ma‘lûmü’l-hudûd bir bâb kasab dükkânı derûnunda mevcûde beyne’l-esnâf gedik tâ‘bir olunur âlât-ı lâzıme-i ma‘lûmesinin nısfının bâ-temessük-ı mütevellî bi’l-icâreteyn mutasarrıfı Hüseyin b. Hasan b. Abdullah bu esnâda bilâ-veled fevt ve hissesi mahlûl ve taraf-ı vakf-ı şerîfe âid olmağla nısf hisse-i mezkûre esnâf-ı mezkûrenin lonca odasında bi’l-cümle esnâf huzûrlarında lede’l-müzâyede müşteriki Osman Ağa üzerinde üç bin beş yüz guruşda karar ve ziyâde ile tâlib-i âharı zuhûr etmeyüp ve meblağ-ı merkūm nısf-ı âlât-ı gedik-i merkūmun bedel-i misli olmağla nısf-ı âlât-ı mezkûr müşteriki merkūm Osman Ağa’ya vakf-ı müşârun-ileyh mütevellîsi vekîli ve kasablar kethüdâsı el-Hâc Hasan Ağa b. el-Hâc Osman Ağa ma‘rifetiyle şürût-ı nizâmlarına tatbîkan meblağ-ı mezkûr üç bin beş yüz guruş mu‘accele-i makbûza ile taraf-ı vakıfdan îcâr ol dahi istîcâr ve kabûl-birle mu‘accele-i mezkûrenin adem-i istîfâsına müte‘allika da‘vâdan taraf-ı vakfı ve mütevellî vekîli merkūmun zimmetini ibrâ eylediğini mütevellî vekîli kethüdâ-yı merkūm el-Hâc Hasan meclis-i şer‘de bâ‘isü’l-i‘lâm merkūm Osman Ağa tarafından vekîl-i şer‘îsi Molla Halil b. Abdullah muvâcehesinde ba‘de’l-inhâ ve’t-tasdîk nısf-ı âlât-ı gedik-i mezkûrun dahi merkūm Osman Ağa’nın zabtı içün ber-mu‘tâd yedine cânib-i vakf-ı müşârun-ileyhden bir kıt‘a temessük i‘tâsı iktizâ eylediği İstanbul Mahkemesi’nden huzûr[-ı âlîlerine i‘lâm olundu.] Fî 21 L sene 1236