İstanbul Mahkemesi 137 Numaralı Sicil (H.1236-1238 / M 1821-1822) cilt: 86, sayfa: 59 Hüküm no: 10 Orijinal metin no: [2a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ahmed b. Ali ile Yani, Simyon ve Zakar’ın birbirlerinin zimmetlerini ibrâ ettikleri Tütün maslahatı musâlahası Ma‘rûz[-ı dâ‘î-i devlet-i aliyyeleridir ki] Arzuhâlde mezkûrü’l-ism Ahmed b. Ali meclis-i şer‘de arzuhâl eden Yani v. Yorgi muvâcehesinde Dellâl Simyon v. Maruka zimmî hâzır olduğu hâlde gāib ani’l-beled Galatalı Çizmeci Zakar zimmî yedinde mâlı olan altı yüz on dokuz buçuk vakıyye tütünü bin yüz yetmiş guruşa bana bey‘ ve teslîm ben dahi yedinden iştirâ ve teslîm ve kabûl ve semen-i mezbûrun üç yüz elli iki guruşunu nakden benden alıp ve dört yüz on guruşunu üçümüz bir meclisde iken şâlî semeninden ol mikdâr dâyini olan hâzır-ı mesfûr Simyon zimmîye vermek üzere mersûmu üzerime cümlemizin kabûlüne mukārin havâle edüp dört yüz on guruşunu boya semeninden zimmetinde bana deyni olan ol mikdâr guruşa takāsen ba‘de’l-istîfâ ben zikr olunan tütünü İstanbul’da sabuncu hanında oda vaz‘ eylediğimde mersûm Yani zimmî sâlifü’l-beyân tütünü gāib-i mersûma ben satam müflis imiş akçesini alamadım deyü zikr olan tütünü benim mâlım olduğu hâlde fuzûlî ahz ve istihlâk etmekle ba‘de’s-sübût kıymet-i şer‘îsini mersûm Yani zimmîden tazmîn taleb ederim deyü tasaddî eylediğim da‘vâmdan mersûm Yani zimmî ile yedi yüz on guruş bedel-i medfû‘ ve makbûza bi’t-terâzî an-inkâr sulh olup ve diğer i‘lâm-ı şer‘î mûcebince muhâlün-bih mezkûr dört yüz on guruşu hâzır-ı mersûm benden ahz ve istîfâ etmekle gāib-i mesfûrun zimmetini berîe olduğuna binâen ziyâdesine ve bi’l-cümle husûs-ı mezkûra ve işbu târih-i i‘lâma gelince sâir cemî‘ hukūk-ı şer‘iyyeye müte‘allika âmme-i da‘vâdan ben mersûm Yani zimmî ile gāib-i mersûm Zakar zimmî ve hâzır-ı mesfûr Simyon zimmîden her birinin zimmetini bi’t-tav‘ ve’r-rızâ ibrâ-i âmm-ı sahîh-i şer‘î ile ibrâ ve iskāt eylediğimde mesfûrân Yani ve Simyon zimmîler dahi bi’l-cümle husûs-ı [2b] mezkûra ve sâir cemî‘ hukūk-ı şer‘iyyeye müte‘allika âmme-i da‘vâdan benim ve mersûm Zakar’dan her birimizin zimmetini ibrâ-i âm ile ibrâ ve iskāt ve her birimiz âharın ibrâsını kabûl eyledik dediğini mersûmân Yani ve Simyon zimmîler bi’l-muvâcehe rızâlarıyla tasdîk eyledikleri İstanbul Mahkemesi’nden huzûr [-ı âlîlerine i‘lâm olundu.] Fî 24 L sene 1236