İstanbul Mahkemesi 137 Numaralı Sicil (H.1236-1238 / M 1821-1822) cilt: 86, sayfa: 61 Hüküm no: 12 Orijinal metin no: [2b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İstefan v. Nikol’un, Yako, İstavri ve Tagodoş’un zimmetlerini ibrâ ettiği Taş imâme adem-i iltifâtı Ma‘rûz[-ı dâ‘î-i devlet-i aliyyeleridir ki] Âsitâne-i aliyyede vâki‘ taş imâmeci esnâfından arzuhâl eden İstefan v. Nikol nâm zimmî meclis-i şer‘de esnâf-ı merkūmeden Yako v. Yasef ve İstavri v. Yani ve Tagodoş v. İsbir zimmîler muvâcehelerinde zimmîyyûn-ı mersûmûn târih-i i‘lâmdan yedi ay mukaddem benim gāib ani’l-meclis Keleş el-Hâc Ebûbekir Ağa’ya zimmetimde deynim olan ma‘lûmü’l-mikdâr meblağa kefîl olduklarına binâen yedimde mâlım olan bin sekiz yüz guruşluk imâme taşımı ahz ve yedi mâh mikdârı yedlerinde kaldıkdan sonra üç gün mukaddem bana teslîm etmişler idi el-hâletü hâzihî ben zikr olunan taşları müddet-i merkūmeden i‘mâl ve âhara bey‘ eylediğim sûretde bana külliyetli meblağ hâsıl olacağı ve sâlifü’l-beyân taşların ticâretinden mahrûmiyetime mersûmûn beni ta‘dîlleri sebeb olduğu indimde zâhir olmağla zimmîyyûn-ı mersûmûn tedîb olunmaları murâdımdır deyü şer‘an iltifâta şâyân olmadığı [3a] bana tefhîm olunan da‘vâmdan fâriğ olup bi’l-cümle husûs-ı mezkûra ve işbu târih-i i‘lâma gelince sâir cemî‘ hukūk-ı şer‘iyye[ye] müte‘allika âmme-i da‘vâdan mersûmûnun zimmetlerini kabûlü hâvî ibrâ ve iskāt eyledim dediğini mersûmûn Yako ve İstavri ve Tagodoş her biri tasdîk eyledikleri İstanbul Mahkemesi’nden huzûr [-ı âlîlerine i‘lâm olundu.] Fî 20 L sene 1236