İstanbul Mahkemesi 137 Numaralı Sicil (H.1236-1238 / M 1821-1822) cilt: 86, sayfa: 61 Hüküm no: 13 Orijinal metin no: [3a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Simyon v. Maroka ile Ahmed Ağa b. Ali’nin birbirlerinin zimmetlerini ibrâ ettikleri Havâleden ahz ü kabz Ma‘rûz[-ı dâ‘î-i devlet-i aliyyeleridir ki] Dellâl Simyon v. Maroka zimmî meclis-i şer‘de bâ‘isü’l-i‘lâm Ahmed Ağa b. Ali mahzarında Tütüncü Yani zimmî hâzır olduğu hâlde benim gāib ani’l-beled Galatalı Çizmecioğlu Zakar v. Atam zimmî zimmetinde şâlî semeninden dört yüz on guruş alacağım olup gāib-i mesfûrun dahi merkūm Ahmed Ağa zimmetinde tütün semeninden bin yüz yetmiş iki guruş alacağı olmağla bundan akdem üçümüz bir meclisde iken medyûnum gāib-i mersûm Zakar zimmî meblağ-ı mezbûr dört yüz on guruş deyn ile beni medyûnu merkūm Ahmed Ağa üzerine deyn-i mezkûrunun ol mikdârından vermek üzere havâle-i mukayyede ile havâle ve her birimiz havâleyi ba‘de’l-kabûl meblağ-ı mezkûr dört yüz on guruş merkūm Ahmed Ağa zimmetinde cihet-i havâleden hakkım olup hatta merkūm Ahmed Ağa meblağ-ı mezkûr dört yüz on guruş cihet-i mezkûreden zimmetinde bana deyn olduğunu ikrâr ve yedime bir kıt‘a deyn temessükü vermişidi el-hâletü hâzihî merkūm Ahmed Ağa meblağ-ı muhâlün-bih mezbûr dört yüz on guruşa tütüncü esnâfının kethüdâsı vekîli es-Seyyid Mustafa Ağa ve sâir ihtiyârları ma‘rifetleriyle bana def‘ ve teslîm ben dahi yedinden tamamen ahz ü kabz etmemle bi’l-cümle husûs-ı mezkûra ve işbu târih-i i‘lâma gelince sâir hukūk-ı şer‘iyyeye müte‘allika âmme-i da‘vâdan tarafeynden her birimiz âharın zimmetini ibrâ-i âm ile kabûlü hâvî ibrâ ve iskāt edüp bu vechile kat‘-ı nizâ‘ eyledik dediğini mezbûr Ahmed Ağa tasdîk eylediği İstanbul Mahkemesi’nden huzûr [-ı âlîlerine i‘lâm olundu.] Fî 24 L sene 1236