İstanbul Mahkemesi 137 Numaralı Sicil (H.1236-1238 / M 1821-1822) cilt: 86, sayfa: 62 Hüküm no: 14 Orijinal metin no: [3a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hüseyin Beşe b. İbrahim’in, Odalarbaşındaki berber ve câmeşûycu dükkânlarını tamir edeceğini taahhüt etmesi Odalarbaşında berber ve câmeşûycu dükkânları ta‘mîri ta‘ahhüdü Ma‘rûz[-ı dâ‘î-i devlet-i aliyyeleridir ki] İstanbul’da Yeniodalar başında vâki‘ birbirine muttasıl bir bâb câmeşûycu ve bir bâb berber dükkânlarının bâ-temessük-ı mütevellî hisse-i ma‘lûmelerinin bi’l-icâreteyn mutasarrıfı ve derûnlarında mevcûde kaleminde mukayyed gedik âlât-ı lâzımelerinin mâliki sâhib-i arzuhâl Hüseyin Beşe b. İbrahim meclis-i şer‘-i münîrde zikr olunan dükkânların kezâlik hisse-i mu‘ayyenesinin mutasarrıfeleri arzuhâlde isimleri mezkûreler Şerîfe Zeliha ve Şerîfe Emine ve Şerîfe Besime Hatunlar benât-ı es-Seyyid Ömer Ağa b. el-Hâc Hasan taraflarından husûs-ı âtîde vekîlleri olduğu zâtlarını ârifân Halil Çavuş b. Musa ve Ali Beşe b. Ahmed şehâdetleriyle sâbit olan es-Seyyid Ahmed Ağa b. es-Seyyid Ahmed muvâcehesinde zikr olunan dükkânlar harâb ve ta‘mîre muhtâc olduğundan hisselerimize göre akçe sarfıyla ta‘mîrini murâd eylediğime müşterikelerim merkūmât dekâkîn-i mezbûrînin hisse-i ma‘lûmeleri kız karındaşımız Şerîfe Âişe nâm yetîmenin olup ve gedikleri senin olmağla sen mâlınla ta‘mîr eyle biz hemen kirâsını alalım deyü ta‘mîrden imtinâ‘ etmeleriyle beynimizde münâza‘a vâkı‘a olmuşdu el-hâletü hâzihî müşterikelerim müvekkilât-ı merkūmât zikr olunan dükkânların işbu târih-i i‘lâm senesi Zilka‘desi gurresinden i‘tibâriyle kırk mâh müddet iktizâ eden kirâlarından fakat kendi hisselerine lâzım gelen mikdârını bi’t-terâzî ta‘mîr-i mezkûra sarf edüp ziyâde masrûfumu teberru‘an li’l-vakf etmek üzere bana emr eylediklerinde ben dahi bu vechile ta‘ahhüd eyledim dediğini vekîl-i merkūm bi’l-muvâcehe tasdîk eylediği İstanbul Mahkemesi’nden huzûr [-ı âlîlerine i‘lâm olundu.] Fî 26 L sene 1236