İstanbul Mahkemesi 137 Numaralı Sicil (H.1236-1238 / M 1821-1822) cilt: 86, sayfa: 70 Hüküm no: 23 Orijinal metin no: [5b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Seyyid Yusuf Usta’nın, Mehmed Beşe b. Mehmed’e olan borcunu ödemeyi kabul ettiği Ma‘rûz[-ı dâ‘î-i devlet-i aliyyeleridir ki] Dergâh-ı âlî Yeniçerilerinin dokuzuncu bölük yoldaşlarından es-Seyyid Mehmed Beşe b. Mehmed meclis-i şer‘-i münîrde eskici esnâfından mukaddemâ şerîki es-Seyyid Yusuf Usta b. Abdülcelil muvâcehesinde merkūm es-Seyyid Yusuf Usta’nın gāib ani’l-meclis Eskici es-Seyyid İbrahim Ağa b. Abdullah bâ-hüccet-i şer‘iyye karzdan ve semen-i mebî‘den deyni olan iki bin üç yüz guruşa ben tarafeynden bi’l-edâ ve’l-kabûl kefâlet-i sahîha-i şer‘iyye ile kefîl bi’l-mâl ve dâmin olduğumdan sonra gāib-i mezbûra meblağ-ı mekfûlün-bih merkūm iki bin üç yüz guruşu bin iki yüz otuz beş senesi Zilhicceti’ş-şerîfesi’nin on altıncı günü târihiyle müverrah ve İstanbul mahkemesi sicilinde mukayyed bir kıt‘a i‘lâm mantûkunca hükm-i hâkimi’ş-şer‘iyye benden ahz etmekle ben dahi mâlımdan gāib-i mezbûra vermediğim meblağ-ı merkūm iki bin üç yüz guruşu merkūm es-Seyyid Yusuf Usta’dan bi’l-mürâca‘a taleb eylediğimde ol dahi kaziyye minvâl-i muharrer üzere olduğunu ikrâr u i‘tirâf edüp lâkin meblağ-ı mezkûru hâlâ edâya iktidârı olmadığından işbu târih-i i‘lâmdan doksan bir gün tamamında def‘aten bana edâ etmek üzere istimhâl etmekle ben dahi bu vechile imhâl ve tecîl eyledim dediğini merkūm es-Seyyid Yusuf Usta bi’l-muvâcehe tasdîk ve meblağ-ı mezkûr iki bin üç yüz guruşu ber-vech-i muharrer edâya ta‘ahhüd eylediği İstanbul Mahkemesi’nden huzûr [-ı âlîlerine i‘lâm olundu.] Fî 11 Za sene 1236