İstanbul Mahkemesi 137 Numaralı Sicil (H.1236-1238 / M 1821-1822) cilt: 86, sayfa: 71 Hüküm no: 24 Orijinal metin no: [5b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İsmail Ağa b. Ali’nin, berber dükkânı tahliyesi davasında Şerîfe Ümmügülsüm Hatun ile sulh olduğu Aksaray’da berber dükkânı tahliye ve masrûf da‘vâsından sulhü, 750 guruş Ma‘rûz[-ı dâ‘î-i devlet-i aliyyeleridir ki] Berber el-Hâc İsmail Ağa b. Ali meclis-i şer‘-i münîrde İstanbul’da Aksaray nâm mahalde menzil tahtında kâin bir bâb berber dükkânının bi’l-icâreteyn mutasarrıfesi zâtı mu‘arrefe Şerîfe Ümmügülsüm Hatun bt. Mehmed Said muvâcehesinde ben bundan akdem İstanbul’da Gurabiyeciler içinde vâki‘ Hâfız Mustafa Usta gediğini mâlikinden alıp hilâf-ı nizâm kendi re’yimle dükkân-ı mezkûr bilâ-emr-i âlî naklim mu‘teber olmamağla mezbûre Şerîfe Ümmügülsüm Hatun bin iki yüz yirmi bir senesi şehr-i Rebî‘ülevveli’nin yirmi dokuzuncu günü târihiyle müverrah ve İstanbul mahkemesi sicilinde mukayyed bir kıt‘a fesh-i îcâr i‘lâmı mûcebince beni dükkân-ı mezkûrdan ihrâc etmişdi el-hâletü hâzihî benim gerek dükkân-ı mezkûrda ve gerek gediğinde alâkam olmadığından ben dükkân-ı mezkûru tahliye ve mutasarrıfesi merkūmeye ba‘de’t-teslîm hâssa mimarbaşısı esbak İbrahim Kâfî Efendi’nin imzâ ve hatmini hâvî bir kıt‘a keşif defteri mantûkunca mezbûre Şerîfe Ümmügülsüm Hatun’un bi-şartü’r-rücû‘ emriyle dükkân-ı mezkûra mâlımdan masrûf iddi‘â eylediğim bin dokuz guruş otuz para müdde‘âmdan merkūme Şerîfe Ümmügülsüm Hatun ile yedi yüz elli guruş bedel-i medfû‘ ve makbûza ber-nehc-i şer‘î sulh olup ziyâdesine ve bi’l-cümle husûs-ı mezkûra müte‘allika âmme-i da‘vâdan tarafeynden her birimiz âharın zimmetini kabûlü hâvî ibrâ ve iskāt edüp bu vechile külliyen kat‘-ı münâza‘a eyledik dediğini merkūme Şerîfe Ümmügülsüm Hatun bi’l-muvâcehe tasdîk eylediği İstanbul Mahkemesi’nden huzûr [-ı âlîlerine i‘lâm olundu.] Fî 11 Za sene 1236