İstanbul Mahkemesi 137 Numaralı Sicil (H.1236-1238 / M 1821-1822) cilt: 86, sayfa: 71 Hüküm no: 25 Orijinal metin no: [6a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İsak Yahûdi’nin, Mehmed Emin Hoca b. Feyzullah’a olan borcunu ödemeyi kabul ettiği Şeker akçesi, hüküm 198 guruş Ma‘rûz[-ı dâ‘î-i devlet-i aliyyeleridir ki] Mehmed Emin Hoca b. Feyzullah nâm kimesne meclis-i şer‘-i münîrde İsak v. Avram Yahûdi muvâcehesinde bundan akdem mersûm İsak Yahûdi’nin bi’d-defa‘ât yedimden ve mâlımdan iştirâ ve kabz eylediği ve ma‘lûmü’l-vezn ve’l-fiyat beynimizde meklû toz şekeri semeninden zimmetinde alacağım olan mebâliğin ve bana olan teslîmâtının hesabını Yahûdi-i mesfûr ile beynimizde hesâb-ı sahih ile lede’r-rü’ye semen-i mezkûrdan mersûm İsak Yahûdi semeninde gayr-ez teslîmât sahhe’l-bâkī yüz doksan sekiz guruş hakkım zuhûr edüp hatta Yahûdi-i mesfûr hesâb-ı mezkûr şübheden ârî olduğunu ve meblağ-ı mezkûr zimmetinde bana sahîhan deyni olduğunu kat‘iyyen ikrâr dahi etmekle meblağ-ı mezkûr yüz doksan sekiz guruşu mesfûr İsak zimmîden hâlâ taleb ederim deyü da‘vâ ettikte ol dahi cevâbında kaziyye minvâl-i muharrer üzere olduğunu bi-tamâmihâ tâyi‘an ikrâr etmeğin mûcebiyle meblağ-ı bâkī-i mezkûr yüz doksan sekiz guruşun bi’t-taleb müdde‘î-i mersûma edâsıyla mesfûr İsak Yahûdi ilzâm olunduğu İstanbul Mahkemesi’nden huzûr [-ı âlîlerine i‘lâm olundu.] Fî 6 Za sene 1236