İstanbul Mahkemesi 137 Numaralı Sicil (H.1236-1238 / M 1821-1822) cilt: 86, sayfa: 72 Hüküm no: 26 Orijinal metin no: [6a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hâce Lübâbe Hatun bt. Ahmed’in, boşandığı eşi Hâfız Mehmed Ağa’nın zimmetini ibrâ ettiği Galata hamamcısının tatlîk i‘lâmı Ma‘rûz[-ı dâ‘î-i devlet-i aliyyeleridir ki] Sâhibe-i arzuhâl zâtı mu‘arrefe Hâce Lübâbe Hatun bt. Ahmed meclis-i şer‘-i münîrde zevc-i mutallıkı Galata’da Yeşildirekli Hamamının hamamcısı derûn-ı arzuhâlde mezkûrü’l-ism el-Hâc Hâfız Mehmed Ağa b. el-Hâc Ahmed’in oğlu ve tarafından husûs-ı âtîde vekâleti es-Seyyid Salih b. Yakub ve Mehmed Beşe b. Hasan şehâdetleriyle sâbit olan Hâfız Ali Efendi muvâcehesinde müvekkil-i merkūm el-Hâc Hâfız Mehmed Ağa altı sene mukaddem beni elli guruş mehr-i müeccel tesmiyesiyle tezevvüc ve duhûl edüp işbu târih-i i‘lâmdan altı ay mukaddem bir talâk ile bâyinen tatlîk edüp mehr-i [müeccel-i] mezkûrum zimmetinde iken bir ay mürûrunda yine elli beş guruş mehr-i müeccel tesmiyesiyle tezevvüc ve duhûl ve işbu sene-i mübâreke Ramazanının beşinci günü bir talâk ile bâyinen tatlîk etmekle iki def‘ada zimmetinde mütekarrir ve ma‘kūdun-aleyh mehr-i müeccelelerim olan cem‘an yüz beş guruş ve nafaka-i iddet-i mu‘ayyene-i ma‘lûmem ve meûnet-i süknâm-ı bâkiyem bi’t-terâzî ta‘yîn olunan yirmi guruş ve bedel-i sulh-i sahîhden müvekkil-i merkūmdan matlûbum olan elli guruş ki cem‘an yetmiş beş guruş müvekkil-i merkūm el-Hâc Hâfız Mehmed Ağa vekîl-i mezbûr Hâfız Ali Efendi ma‘rifetiyle bana def‘ ve teslîm eylediğinde ben dahi yedinden tamamen ve kâmilen ahz ü kabz edüp hukūk-ı zevciyete ve zevcim müvekkil-i merkūmun ikrâr-ı mücerredini sebeb tutarak kendisinden cihet-i beyân etmeksizin matlûbum olan üç yüz guruş ile zevcim merkūmun mukaddemâ bana beynimizde ma‘lûm icâre kavliyle müsâneheten îcâr ve teslîm eylediği hamam-ı mezkûr üç buçuk sene taht-ı icâremde olmağla müddet-i mezkûrede hamam-ı merkūm hâsılâtından hıdr nâmıyla müvekkil-i merkūmdan matlûb eylediğim üç yüz elli guruş mutâlebesine ve işbu târih-i i‘lâma gelince sâir cemî‘ hukūk-ı şer‘iyyeye müte‘allika âmme-i de‘âvîden ben müvekkil-i merkūm ile oğlu vekîl-i merkūmdan her birinin zimmetleri[ni] ibrâ ve iskāt eylediğimde onlar dahi kezâlik hukūk-ı zevciyete ve sâire müte‘allika âmme-i da‘vâdan benim zimmetimi ibrâ ve iskāt ve her birimiz âharın ibrâsını kabûlle külliyen kat‘-ı nizâ‘ eyledik dedikde vekîl-i merkūm asâleten ve vekâleten tasdîk eylediği İstanbul Mahkemesi’nden huzûr [-ı âlîlerine i‘lâm olundu.] Fî 13 Za sene 1236