İstanbul Mahkemesi 137 Numaralı Sicil (H.1236-1238 / M 1821-1822) cilt: 86, sayfa: 73 Hüküm no: 27 Orijinal metin no: [6b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Ağa b. Hüseyin ile Sarraf Papasoğlu Vasil v. Apostol’un birbirlerinin zimmetlerini ibrâ ettikleri Galata muhzırının sarrafla sulhü, 300 guruş Ma‘rûz[-ı dâ‘î-i devlet-i aliyyeleridir ki] Sâhib-i arzuhâl es-Seyyid el-Hâc Mehmed Ağa b. Hüseyin meclis-i şer‘de sarraf tâifesinden arzuhâlde mezkûrü’l-ism Papasoğlu Vasil v. Apostol zimmî muvâcehesinde bin iki yüz otuz senesi Muharreminin dokuzuncu günü mâlımdan mersûm Vasil zimmîye üç bin üç yüz elli guruş karz verdiğimden sonra mesfûr Vasil zimmî Ersek mukāta‘asının iltizâm temessükü yedimdedir sen iki bin beş yüz guruş bedel mukābelesinde kabûl eyle diyerek temessükü yedime teslîm ve bedel-i iltizâm-ı mezkûru ve deyn-i mezkûrunun ol mikdârına mahsûb edüp lâkin ben mahalline vardığımda mukāta‘a-i mezkûreyi Hüdâvendigâr sancağı mutasarrıfı bana zabt ettirmediğinden Der-aliyye’ye avdet ve temessükü sarraf-ı mersûma edâ eylediğimde deyn-i mezkûrundan ancak bedel-i iltizâma mahsûb eylediği iki bin guruşu bana verüp bâkīsi olan sekiz yüz elli guruş zimmetinde kalmağla hâlâ taleb ederim deyü tasaddî eylediğim da‘vâmdan bâ-tavassut-ı muslihîn sarraf-ı mesfûr Vasil ile an-inkâr üç yüz guruş bedel-i medfû‘ ve makbûza ber-nehc-i şer‘î sulh edüp ziyâdesine ve bi’l-cümle husûs-ı mezkûra ve işbu târih-i i‘lâma gelince sâir cemî‘ hukūk-ı şer‘iyyeye müte‘allika âmme-i da‘vâdan her birimiz âharın zimmetini kabûlü hâvî ibrâ ve iskāt eyledik deyü eylediği takrîrini Vasil zimmî bi’l-muvâcehe tasdîk eylediği İstanbul Mahkemesi’nden huzûr [-ı âlîlerine i‘lâm olundu.] Fî-gurre-i Za sene 1236