İstanbul Mahkemesi 137 Numaralı Sicil (H.1236-1238 / M 1821-1822) cilt: 86, sayfa: 78 Hüküm no: 33 Orijinal metin no: [8a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kadayıfçı Hüseyin Beşe b. İbrahim’in, Hasan Alemdâr aleyhine açtığı alacak davasının mesnetsiz olduğu Kadayıfçının dakīk akçesi adem-i iltifâtı Ma‘rûz[-ı dâ‘i-i devlet-i aliyyeleridir ki] Sâhib-i arzuhâl Kadayıfçı Hüseyin Beşe b. İbrahim nâm kimesne li-ebeveyn er karındaşı Hasan Beşe hâzirûn olunduğu hâlde meclis-i şer‘-i münîrde arzuhâlde ism-i mezkûr Hasan Alemdâr b. Ahmed ve İbrahim Ağa b. Ömer muvâcehelerinde ben bin iki yüz senesi Şa‘bâni’l-mu‘azzamı hılâlinde Anadolu cânibine âzim olduğumda merhûm Hasan Alemdâr benden dakīk-i has semeninden iki yüz yetmiş üç guruş ve merkūm İbrahim Ağa yüz elli dört guruş taleb etmeleriyle ben dahi ikrâr ve yedlerine temessük verüp azîmet ettikden sonra merkūmân Hasan Alemdâr ve İbrahim Ağa karındaşım hâzır-ı merkūmu şehr-i mezkûrun yirmi yedinci günü Ahî Çelebi Mahkemesine huzûr-ı hâkime getirip meblağayn-ı mezkûreyne kefâletini şuhûd-ı udûl ile ba‘de’l-isbât ve’l-hükm meblağayn-ı mezkûreyni hâzır-ı merkūmdan bi-hükmi’l-kefâle ahz etmişler idi lâkin ben merkūmân Hasan Alemdâr ve İbrahim Ağa’nın bi’d-defa‘ât bana bey‘ ben dahi kadayıf i‘mâliyle istihlâk eylediğim dakīki her bâr narh-ı cârî üzere almayıp rızâmla ahyânen narhdan ziyâdeye aldığımdan mukaddemâ bi’l-cümle beynimizde cârî hesâbımız rü’yet olunup bu ana değin narh-ı cârîden ziyâde olarak benden aldıkları meblağı ve yâhud kefîlimden aldıkları meblağayn-ı mezkûreyni bana red ve teslîm etmeleri murâdımdır demesi bu mertebe ile şer‘an mesmû‘a ve iltifâta şâyân olmamağla kelâmına iltifât olunmadığı İstanbul Mahkemesi’nden huzûr [-ı âlîlerine i‘lâm olundu.] Fî 13 Za sene 1236