İstanbul Mahkemesi 137 Numaralı Sicil (H.1236-1238 / M 1821-1822) cilt: 86, sayfa: 82 Hüküm no: 38 Orijinal metin no: [9a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İsmail Efendi b. Sunullah’ın vârislerinin, Mikail v. Karabet aleyhine açtıkları alacak davasının mesnetsiz olduğu Enfiye kâtibi veresesinin sarrafla adem-i iltifât, 1.800 guruş Ma‘rûz[-ı dâ‘î-i devlet-i aliyyeleridir ki] Derûn-ı arzuhâlde mezkûrü’l-ism olup medîne-i Üsküdar’da sâkin iken bundan akdem vefât eden enfiye kâtibi İsmail Efendi b. Sunullah’ın verâseti zevce-i metrûkesi Nefîse Hatun bt. Abdullah ile sulbî kebîr oğlu Hasan Ağa ve sulbiye kebîre kızları Âişe ve Fâtıma Hatunlara inhisârı tahakkukundan sonra ashâb-ı arzuhâlden zâtı mu‘arrefe merkūme Âişe Hatun nefsinden asâleten ve mezbûr Hüseyin Ağa kendi nefsinden asıl ve zevce-i mezbûre Nefîse Hatun ile mezbûre Fâtıma Hatun taraflardan husûs-ı âtîde vekîlleri olmak üzere meclis-i şer‘-i münîrde sarraf tâifesinden Beşmeş oğlu Mikail v. Karabet zimmî muvâcehesinde mûrisimiz babamız müteveffâ-i merkūmun hayâtında bundan akdem Eğin kasabasında hâlik olan Artin zimmî zimmetinde bâ-temessük karzdan matlûbu olan üç bin iki yüz seksen sekiz guruşdan bâkī bin sekiz yüz guruşu mûrisimiz müteveffâ-i mezbûr hayâtında hâlik-i mersûm Artin zimmîden kable’l-ahz mersûm Artin zimmî hâlik olmağla babamız merkūm İsmail Efendi hayâtında meblağ-ı mezkûr bin sekiz yüz guruşu hâlik-i mersûm Artin zimmînin zikr olunan Eğin kasabasında terekesine vâzı‘u’l-yed olan verese-i ma‘lûmesinden tahsîl içün ısdâr ettirdiği mahalli hâkimine hitâben bir kıt‘a emr-i âlîşânı hayâtında işbu sarraf-ı mesfûr Mikail zimmîye irâe eyledikde mesfûr Mikail’den meblağ-ı mezkûra damân ve iltizâmı mutazammın kelâm sâdır olmayup ancak sen şimdilik sabr eyle ben mahalline mektûb gönderip taht-ı râbıtaya idhâl ettiririm demesine binâen babamız merkūm dahi emr-i âlîşân-ı mezkûru mahalline göndermeyip tehîr edüp ve el-hâletü hâzihî meblağ-ı mezkûrun mahallinden tahsîli bize müte‘assir olmağla mücerred sarraf-ı mersûm babamız müteveffâ-i mezbûra hayâtında şimdilik sabr eyle ben mektûb gönderip taht-ı râbıtaya idhâl ederim dediğine binâen meblağ-ı mezkûr bin sekiz yüz guruşu babamız mütevaffa-yı merkūmun defter-i kassâmına idhâl içün sarraf-ı mezkûr Mikail zimmîden tahsîl olunması bizim verese-i sâire-i mezkûrenin murâdımızdır deyü takrîr-i meşrûhları üzere tasdîk eyledikleri da‘vâları şer‘an mesmû‘a ve iltifâta şâyân olmamağla da‘vâ-yı mezkûreleriyle sarraf-ı mersûm Mikail zimmîye bî-vech-i şer‘î mu‘ârazadan men‘ olundukları İstanbul Mahkemesi’nden huzûr [-ı âlîlerine i‘lâm olundu.] Fî 17 Za sene 1236