İstanbul Mahkemesi 137 Numaralı Sicil (H.1236-1238 / M 1821-1822) cilt: 86, sayfa: 84 Hüküm no: 40 Orijinal metin no: [9b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Süleyman Ağa b. Süleyman’ın dikicibaşı tayin edildiği Dikicibaşılık nasbı i‘lâmı Ma‘rûz[-ı dâ‘î-i devlet-i aliyyeleridir ki] Âsitâne-i aliyyede vâki‘ dikici esnâfından ashâb-ı arzuhâl Çizmecibaşı el-Hâc İbrahim Ağa ve Yiğitbaşı Kara Ahmed Ağa ve ustalarından Hotinli Mehmed Ağa ve es-Seyyid Mehmed ve es-Seyyid Ali ve es-Seyyid Hüseyin ve Ali Paşa köşe ustası Ali ve es-Seyyid Ömer ve el-Hâc Mehmed Ağa ve Salih Usta ve Pîrli Mehmed ve Ahmed ve Hüseyin ve es-Seyyid Ahmed ve İbrahim ve Mustafa ve es-Seyyid Ebûbekir ve diğer Ebûbekir ve es-Seyyid Hüseyin ve diğer Mustafa ve mestçiler yiğitbaşısı Mehmed Ağa ve es-Seyyid Mahmud ve Abdullah ve Yusuf ve Mahmud ve es-Seyyid Mehmed ve es-Seyyid Hasan ve çedikçiler kethüdâsı el-Hâc Osman Ağa ve Ali ve Hasan ve Mehmed ve Kör Mehmed ve Mustafa ve Musa ve pabuccular köşe ustası es-Seyyid Ebûbekir Ağa ve Ellialtı oğlu Mustafa ve Ahmed Usta ve Feyzi ve Mustafa ve Süleyman ve Osman ve Ali ve yemeniciler yiğitbaşısı el-Hâc Mehmed Ağa ve Mehmed Usta ve Mustafa ve el-Hâc İbrahim ve Abdi ve Irgad Pazarı köşe ustası Ali Ağa ve Çatal Han köşe ustası Süleyman Ağa ve sâirleri ve Takyeci Hanı köşe ustası Serope ve Emirhan köşe ustası Agob ve Mercan Hanı köşe ustası Bedros ve Sultan Odaları köşe ustası Zakarya ve Ali Paşa Hanı köşe ustası Melkon ve Tahta Minâre köşe ustası Avanes ve Karaman köşe ustası Bedik ve Yolgeçen Hanı köşe ustası Avanes ve Vezîr Hanı köşe ustası Yezik ve Şehzâdebaşı köşe ustası Artin ve Samatya köşe ustası Marik ve Lanka köşe ustası Karabet ve Davudpaşa köşe ustası Mağar ve Tavuk Pazarı köşe ustası Karabet ve Vefâ Hanı köşe ustası Begod ve Dülbentçi Hanı köşe ustası Melkon ve Takyeci Hanı köşe ustası Mestçi Karabet ve re‘âyâ Çizmeciler köşe ustası Artin ve Odunkapısı köşe ustası Agob ve kapan-ı dakīk köşe ustası Bedros ve Alaca Hamam köşe ustası Bedros ve Yenikapı yemeniciler köşe ustası Kasbar ve sâirleri meclis-i şer‘-i münîrde esnâf-ı merkūmeden Kulak Süleyman Ağa b. Süleyman mahzarında hâlâ dikicibaşı es-Seyyid Ahmed Ağa hâzır olduğu hâlde hâzır-ı merkūm es-Seyyid Ahmed Ağa bâ-berât-ı âlî dikicibaşı olup lâkin örf [ve] âdetimize vâkıf olmadığından umûr ve husûsumuzu esnâfımızın Müslim ihtiyâr ustalarıyla söyleşmeyip esnâfımızın ehl-i zimmet re‘âyâsıyla söyleşip re’yleriyle hareket ve esnâfımızın ehl-i İslâmının umûrunu dahi kefere re’yiyle rü’yet eylemesi ihtilâl-i umûr-ı esnâfa bâdî ve cümlemizin kendisinden müteneffir olmamıza bâ‘is olmağla cümlemiz kendiden şekvâ ve azline teşebbüs eylediğimizde hâzır-ı merkūm es-Seyyid Ahmed Ağa rızâsıyla keff-i yed eylediğine binâen yeri hâlî ve hizmet-i lâzımesi mu‘attal kalıp ve işbu merkūm Süleyman Ağa esnâfımıza mukaddemâ dikicibaşı olduğundan örf ve âdetimize ârif ve şürût-ı nizâmımıza vâkıf ve her vechile dikicibaşılık uhdesinden gelmeğe kādir olup hâzır-ı merkūm Süleyman Ağa’nın mukaddemâ dikicibaşılığı edâsında hüsn-i hâlini mübeyyin yedimizde i‘lâm-ı şer‘î dahi olmağla merkūm Süleyman Ağa bu def‘a dahi esnâfımıza dikicibaşı nasb ve ta‘yîn olunması niyâzımızdır deyü her biri bi’l-ittifâk iltimâs eylediklerinde hâzır-ı merkūm es-Seyyid Ahmed Ağa dahi ba‘de’t-tasdîk iltimâsına binâen dikicibaşılıktan [10a] azl ve ihrâc olunup yerine merhûm Süleyman Ağa kemâ-fi’s-sâbık merkūmun ref‘inden dikicibaşı nasb ve ta‘yîn olundukta ol dahi kabûl ve esnâf-ı merkūmenin cemî‘ umûr-ı husûslarını kadîmden olageldiği vechile idâre ve rü’yete ve bir ferdi hilâf-ı şer‘-i şerîf rencîde etmemeğe ta‘ahhüd etmekle dikicibaşılık-ı mezkûr hâzır-ı merkūmun ref‘inden merkūm Süleyman Ağa’ya tevcîh ve yedine berât-ı şerîf-i âlîşân sadaka ve ihsân buyrulması iktizâ eylediği İstanbul Mahkemesi’nden huzûr-ı âlîlerine i‘lâm olundu. Fî 23 Za sene 1236