İstanbul Mahkemesi 137 Numaralı Sicil (H.1236-1238 / M 1821-1822) cilt: 86, sayfa: 85 Hüküm no: 41 Orijinal metin no: [10a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Zümrütçü Ohannes v. Donik’in, Şerîfe Ayşe bt. Seyyid Hüseyin ile pencere davasında sulh oldukları Keşf-i pencere i‘lâmı Ma‘rûz[-ı dâ‘i-i devlet-i aliyyeleridir ki] Sâdır olan fermân-ı âlîlerine imtisâlen zikri âtî husûsu mahallinde ketb ü tahrîr ve istimâ‘ ve fasl ü hasmı içün savb-ı şer‘-i enverden irsâl olunan Başkâtib İbrahim Ârif Efendi dâ‘îleri ve bi’l-ma‘iyye rü’yete memûr nezâret-i hazret-i Sadâret-penâhîde âsûde evkāf müfettişi müderrisîn-i kirâmdan fazîletlü Mehmed Said Efendi tarafından meb‘ûs Kâtib Hasan Hasbi Efendi hâssa mimarı hulefâsından ser-halîfe Mustafa Ağa ve Mehmed Halîfe ile nezâret-i hazret-i müşârun-ileyhde âsûde evkāfdan sâhibât-ı hayrâtdan merhûme Zehra Hatun’un medîne-i hazret-i Ebi Eyyüb-i Ensârî’de vâki‘ mescid-i şerîfi vakfı müsakkafâtından İstanbul’da Kumkapı kurbünde Muhsine Hatun Mahallesinde Değirmen sokağında külhan odaları demekle meşhûr mahalde vâki‘ Şerîfe Âişe bt. es-Seyyid Hüseyin nâm hatunun bi’l-icâreteyn bâ-temessük-ı mütevellî mutasarrıfe olduğu iki direk üç kat ebniyeli bir bâb nâ-tamam menziline varup huzûr-ı Müslimînde ba‘de akdi’l-meclis menzil-i mezkûr verâsında kâin nezâret-i dâ‘îlerinde olan evkāfdan İstanbul’da Gedikpaşa kurbünde Eminsinan Mahallesinde Tevfîki Hamza Paşa Câmi‘-i şerîfine eczâ-i şerîfe vaz‘ eden ashâb-ı hayrâtdan merhûm oduncubaşı Ahmed Bey Vakfı müsakkafâtından ma‘lûmü’l-hudûd ve’l-müştemilât bir bâb menzile mutasarrıf olan sâhib-i arzuhâl Kuyumcu Zümrütçü Ohannes v. Donik nâm zimmî tarafından husûs-ı âti’l-beyânda vekîl-i müseccel-i şer‘îsi Keresteci Agob v. Abraham zimmî meclis-i ma‘kūd-ı mezkûrda derûn-ı arzuhâlde mezkûratü’l-ism mezbûre Şerîfe Âişe Hatun’un sadriye kızı ve tarafından husûs-ı âtîde vekîl olduğu zâtını ârifân mahalle-i mezbûre câmi‘-i şerîfi imâm vekîli el-Hâc Hâfız Mehmed Emin Efendi b. Salih ve Keresteci Mustafa Ağa b. el-Hâc Mehmed nâm kimesneler şehâdetleriyle sâbit olan zâtı mu‘arrefe diğer Şerîfe Âişe bt. el-merhûm Arnabud Ahmed Kapudan nâm hatun mahzarında zikr olunan Zehra Hatun Vakfı’nın mütevellîsi Mustafa Efendi tarafından mürsel vekîli kâtib-i câbî-i vakf Eyyübî Mehmed Emin Efendi b. İsmail nâm kimesne hâzır olduğu hâlde müvekkile-i mezbûre Şerîfe Âişe Hatun bu esnâda mutasarrıfe olduğu arsası üzerine müceddeden binâ ve inşâ eylediği bir bâb menzilinin ulyâsında ve bir tarafında vâki‘ deryâya nâzır bir bâb odasının birer zirâ‘ dörder parmak arzında ve ikişer zirâ‘ altışar parmak kaddinde olan iki aded pencerelerinden müvekkilim mersûm Ohannes zimmînin mutasarrıf olduğu menzilinin makarr-ı nisvân olan ulyâ ve vustâda kâin odasının derûnuna ve süflâda vâki‘ havlu ve bahçede olan bi’r-i mâ’ mahallerine nezâret ve zarâr-bîni olup ancak müvekkilim mersûm mutasarrıf olduğu menzilinde sedd-i bahçe duvarı üzerine müvekkile-i mezbûre Şerîfe Âişe Hatun’un inşâ eylediği menzilinin sâlifü’z-zikr iki aded pencereleri hizâsına pencere-i mezkûrelerin havâle ve zarârı men‘ oluncaya değin taş duvar üzerinde olan tuğladan mebnî havâle ve duvarı terfî‘ etmek murâd eylediğinde müvekkile-i mezbûre [10b] Şerîfe Âişe Hatun bi-gayr-ı vech müvekkil-i zimmî-i mersûmu men‘ irâdesinde olmağla mümâna‘atı men‘ ve def‘ olunmak müvekkilim mersûmun matlûbudur deyü bi’l-vekâle da‘vâ ettikte vekîl-i mezbûra diğer Şerîfe Âişe Hatun dahi cevâbında ber-vech-i muharrer bi’l-vekâle ikrâr ve tasdîk ve şer‘an nezâret ve havâle ve zarârını def‘ müvekkile-i merkūme Şerîfe Âişe Hatun’a iktizâ eylediği kızı vekîl-i mezbûreye tefhîm olundukta ol dahi mücâb ve mülzem olup lâkin işbu mu‘âyene olunan mârrü’l-beyân iki aded pencereler ile duvar-ı mezkûrun mimârân-ı mezbûrân mesâhalarıyla bir zirâ‘ on parmak fazlası olup ve müvekkil-i mersûm Ohannes zimmî duvar-ı mezkûr üzerine rızâsıyla kendi mâlından beş zirâ‘ tûlünde ve bir buçuk zirâ‘ kaddinde nezâret kat‘ oluncaya kadar cam tahtasından havâle-i inşâsına müte‘ahhid olduğunu vekîli mersûm Agob zimmî işbu meclis-i ma‘kūd-ı mezkûrda takrîr ettikde ben dahi vech-i meşrûh üzere bi’l-vekâle izin verdim deyip bi’t-terâzî kat‘-ı nizâ‘ eylediklerini Mevlânâ-yı mezbûr dâ‘îleri mahallinde tahrîr ve ma‘an meb‘ûs ümenâ-i şer‘den Çukadâr el-Hâc Osman b. Mehmed ve Muhzır Mehmed Emin Çelebi b. Mustafa ile meclis-i şer‘a gelüp alâ-vukū‘ihi inhâ ve takrîr eylediği İstanbul Mahkemesi’nden huzûr [-ı âlîlerine i‘lâm olundu.] Fî 24 Za sene 1236