İstanbul Mahkemesi 137 Numaralı Sicil (H.1236-1238 / M 1821-1822) cilt: 86, sayfa: 87 Hüküm no: 42 Orijinal metin no: [10b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bezzâzistanî Mustafa Ağa’nın, Emine Hanım bt. Hâfız Osman aleyhine açtığı davanın mesnetsiz olduğu Tarîk-ı hâs nizâ‘ı keşfi Ma‘rûz[-ı dâ‘î-i devlet-i aliyyeleridir ki] Sâdır olan fermân-ı âlîlerine imtisâlen zikri âtî husûsu mahallinde ketb ve tahrîr ve istimâ‘ ve fasl ve hasmı içün savb-ı şer‘-i enverden me’zûnen bi’l-hükm irsâl olunan Kâtib Mehmed Hidâyetullah Efendi dâ‘îleri ve bi’l-ma‘iyye rü’yete memûr sâye-i nezâret-i hazret-i Şeyhülislâm -sellemehü’s-selâmî-de âsûde evkāf müfettişi müderrisîn-i kirâm-ı zevi’l-ihtirâmdan Kütahyavîzâde fazîletlü es-Seyyid Mehmed Ârif tarafından meb‘ûs Kâtib Abdullah Vahid Efendi hâssa mimarı hulefâsından Mehmed Emin ve Safi Mustafa Halîfeler ile İstanbul’da Yüksek Kaldırım nâm mahalde Dede Mahallesinde Terâzi sokağı demekle ma‘rûf münâza‘un-fih olan tarîk-i hâs üzerine varup cerîdede mazbûtü’l-esâmî Müslimîn huzûrlarında akd-i meclis-i şer‘-i Nebevî ettiklerinde nezâret-i hazret-i müşârun-ileyhde âsûde evkāfdan mukābele-i süvâri başhalîfesi merhûm Bâkîzâde el-Hâc İsmail Efendi Vakfı’ndan olup tarîk-i hass-ı merkūmda vâki‘ yedi aded muhterik menzil arsasından beş aded muhterik menzil arsasına bâ-temessükât-ı mütevellî bi’l-icâreteyn mutasarrıf olan Bezzâzistanî Mustafa Ağa b. Abdullah meclis-i ma‘kūd-ı mezkûrda yine vakf-ı mezbûrdan tarîk-i hass-ı merkūm ağzında bir bâb menzil ile tarîk-i hass-ı merkūm nihayetinde vâki‘ ma‘lûmü’l-hudûd bir bâb muhterik menzil arsasına iki kıt‘a mütevellî temessükü mantûkunca bi’l-icâreteyn mutasarrıfe olan arzuhâlde mezkûretü’l-ism mu‘arrefetü’z-zât Emine Hanım bt. Hâfız Osman muvâcehesinde vakf-ı mezbûr mütevelliyesi Âişe Hanım hâzır olduğu hâlde işbu derûnunda akd-i meclis-i şer‘-i âlî olunan mezbûre Emine Hanım’ın bâ-temessük-ı mütevellî mutasarrıfe olduğu bir bâb muhterik menzil arsasında leylen fâhişe avratlar yattığından mâ‘adâ arsa-yı mezkûrenin bana lüzûmu dahi olmağla arsa-yı mezkûreyi benim arsa-yı mezkûrelerime ilâve içün bâ-re’y-i mütevellî bana fâriğa ve imtinâ‘ eylediği sûretde tarîk-i hass-ı mezkûru külliyen sedd ve bendime mümâna‘at etmemek üzere merkūme Emine Hanım’a cebr olunmak murâdımdır demesi sahîha ve meşrû‘a olmayup ve ferağ-ı mezkûr husûsu rızâya mütevakkıf idüğünü mezbûr Mustafa Ağa’ya tefhîm eylediklerini kâtibân-ı mezbûrân mahallinde ketb ve tahrîr ve ma‘an meb‘ûs ümenâ-i şer‘le meclis-i şer‘a gelüp alâ-vukū‘ihi inhâ ve takrîrleri İstanbul Mahkemesi’nden huzûr [-ı âlîlerine i‘lâm olundu.] Fî 28 Ş sene 1236