İstanbul Mahkemesi 137 Numaralı Sicil (H.1236-1238 / M 1821-1822) cilt: 86, sayfa: 88 Hüküm no: 43 Orijinal metin no: [11a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bogasıcı esnafından Mosayil v. Avanes’in hüsnü halinin bildirilmesi Bogasıcı zimmînin hüsn-i hâl i‘lâmı Ma‘rûz[-ı dâ‘i-i devlet-i aliyyeleridir ki] Sâdır olan fermân-ı âlişâna imtisâlen işbu arzuhâle nazar olundukta İstanbul’da Uzunçarşı başında İğneci Hanı kurbünde bogasıcı dükkânında mütemekkin bogasıcı esnâfından arzuhâlde ismi mastûr Anadolu’da Maden kazâsı ahâlîsinden Mosayil v. Avanes zimmî dükkân-ı mezkûrda oturur iken efranc kıyâfetinde iki nefer Nasrâni tebessüm ederek mu‘tâdları üzere başlarından şabkalarını çıkararak zimmî-i mersûma âşinâlık edüp mukaddemâ dahi bir iki ruhbân dükkânına geldiğini fesci esnâfından ve pirinççi esnâfından evlâd-ı Arabdan el-Hâc Mehmed ve el-Hâc Halil nâm iki nefer kimesneler rü’yet eylediğini zâbıtâna inhâ ile mersûmu Bâb-ı âliye irsâl ve habsettirdikleri işbu arzuhâlde müstebân oldukdan sonra zimmî-i mesfûr Bâb-ı âliden mübâşir ta‘yîn buyrulan kapıkethüdâsı bendeleri ma‘rifetiyle meclis-i şer‘a ihzâr ve mücîzân-ı merkūmân hâzır oldukları hâlde bogasıcı esnâfının kethüdâsı Mehmed Emin Ağa ve esnâfından es-Seyyid Mehmed Akif Ağa ve Hâfız Mehmed Ağa ve İbrahim Ağa ve es-Seyyid Mehmed Emin Ağa ve es-Seyyid Hâfız Ahmed Ağa ve Osman Ağa ve Halil Ağa ve Ahmed Ağa ve yiğitbaşıları es-Seyyid Ahmed Ağa ve sâir otuz neferden mütecâviz mazbûtü’l-esâmî kimesnelerden hâlî tecessüs olundukta mersûm Mosayil zimmî on iki yaşından berü yanlarında bogası ticâretiyle me’lûf ve ırzıyla mukayyed olup hilâf-ı rızâ-i âlî hareket kendisinden me’mûl olmadığını ve bogasıcı esnâfı Efrenc tâifesinden batiste [patiska] ve sâir emti‘a iştirâ edegelmeleriyle ahz u i‘tâ hasebiyle beynlerinde âşinâlık müsteb‘ad olmadığını bi’l-muvâcehe ihbâr zimmî-i mersûma bi’l-vücûh tekeffül eylediklerini takrîr eyledikleri İstanbul Mahkemesi’nden huzûr [-ı âlîlerine i‘lâm olundu.] Fî 3 Zilhicce sene 1236