İstanbul Mahkemesi 137 Numaralı Sicil (H.1236-1238 / M 1821-1822) cilt: 86, sayfa: 88 Hüküm no: 44 Orijinal metin no: [11a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bayram gecelerinde akşam namazından sonra mescitlerde kandil yakılması Zilhicce gurresi sübûtu i‘lâmı Ma‘rûz[-ı dâ‘î-i devlet-i aliyyeleridir ki] İstanbul Kādısı fazîletlü efendi işbu i‘lâmınız rikāb-ı hümâyûn-ı mülûkâneye arz ile manzûr-ı cenâb-ı Hilâfet-penâhî olmağın mûcebince leyle-i merkūmede îkād-ı kanâdil olunmasını iktizâ edenlere tenbîhe mübâderet eyleyesin deyü [buyruldu]. Fî 4 Za sene 1236 Vakfe-gâh-ı şevket ve iclâl ve bârgâh-ı übbühet ve ikbâl olan südde-i ulyâ-yı felek-misâlleri türâbınâ ma‘rûz-ı abd-i dâ‘i-i hâlisü’l-bâlleridir ki Târih-i hicret-i zübde-i sülâle-i hazret-i zebihullâh ve İbrahim aleyhim ve alâ-âlihim ezka’t-tahiyye ve’t-teslîm efendimiz hazretlerinin bin iki yüz otuz altı senesi Zilka‘deti’ş-şerîfesinin yirmi dokuzuncu Salı günü akşamı ba‘de’l-gurûb havâda gaym olduğu hâlde kenar-ı ufukda kıbleye müteveccih hilâl-i Zilhicceti’ş-şerîfe rü’yet olunduğu lede’t-tezkiye adâletleri zahîre İstanbul’da Karabaş Câmi‘-i şerîfi İmâmı es-Seyyid Ahmed Efendi b. el-Hâc Hasan ve Manav Hüseyin Çelebi b. Mustafa şehâdetleriyle mahzar-ı hasm-ı câhid-ı şer‘îde ba‘de’d-da‘vâ vech-i vecih-i şer‘î üzere sâbit ve ol vechile gurre-i Zilhicceti’ş-şerîfe yevm-i Çarşamba’dan mazbût ve müseccel olmağın ber-muktezâ-yı şer‘-i Nebi sâhibü’l-makāmi’l-Mahmûd şehr-i merkūmun dokuzuncu hamîs günü arefe-i Rıdvan-hedâyâ ve ferdâsı Cuma günü îd-i edhâ-yı meyâmin-metâyâ olmağla leyle-i îd-i müşârun-ileyhâda kulûb-i müminîn mütemetti‘-i safa-yı meserret-karîn kılınmak içün ve devlet-i aliyye-i Osmaniye -dâmet müeyyidetü bi’t-teyîdâti’s-Sübhâniyye- de’b-i dirîni üzere bi’l-cümle ruûs-ı minârât-ı cevâmi‘ ve mesâcid îkād-ı kanâdil ile tezyîn olunmak bâbında selâtîn-i mâziye -eskenehümullâhu te‘âlâ fi’l-cinâni’l-âliyye- hazerâtı cevâmi‘-i şerîfeleri kayyımbaşılarına tenbîhi hâvî fermân-ı mütehattimü’t-telbiyeleri sudûru iktizâ eylediği İstanbul Mahkemesi’nden bârgâh-ı sipihr-i i‘tilâlarına i‘lâm olundu el-emru li-veliyyü’l-emr.