İstanbul Mahkemesi 137 Numaralı Sicil (H.1236-1238 / M 1821-1822) cilt: 86, sayfa: 92 Hüküm no: 49 Orijinal metin no: [12a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Borcundan dolayı hapsedilen Kostantin v. Yani’nin, hapisten çıkarılması ve Mehmed Şâkir Ağa’ya borcunu ödemesi gerektiği Mahbûsdan ihrâc Ma‘rûz[-ı dâ‘î-i devlet-i aliyyeleridir ki] [İşbu] arzuhâlde mastûrü’l-ism ayak sarrafı Kostantin v. Yani zimmî meclis-i şer‘-i münîrde arzuhâl eden Petro v. Hristo zimmî hâzır olduğu hâlde tütüncü esnâfından Mehmed Şâkir Ağa b. el-Hâc Mehmed Memiş mahzarında hâzır-ı mesfûrun merkūm Mehmed Şâkir Ağa’ya tütün semeninden deyni olan üç bin iki yüz doksan guruşa ben tarafeynden bi’l-emr ve’l-kabûl kefîl ve dâmin olduğuma binâen merkūm Mehmed Şâkir Ağa yedinde olan işbu târih-i i‘lâm senesi Zilka‘desinin yirmi altıncı günü ile müverrah ve Galata mahkemesinde mukayyed bir kıt‘a hâkim-i i‘lâm mantûkunca huzûr-ı hâkimde bi-hükmi’l-kefâle ikrârım mûcebince üzerime hükm ettirtip lâkin asıl-ı hâzır-ı mesfûr Musa olmağından ben meblağ-ı mekfûlün-bih-i mezkûru merkūm Mehmed Şâkir Ağa’ya edâdan imtinâ‘ etmememle beni habsettirmişdi el-hâletü hâzihî merkūm Mehmed Şâkir Ağa meblağ-ı mezbûru taksîte rabtıyla beni habsden ihrâc etmesi benim ve asıl-ı hâzır-ı mesfûrun murâdımızdır demesi rızâya tevakkuf eylediği mersûm Sarraf Kostantin zimmîye ba‘de’t-tefhîm alâ-mûceb-i i‘tirâfihî meblağ-ı mekfûlün bih-i merkūm üç bin iki yüz doksan guruş bi’t-taleb kefîl-i mersûm ayak sarrafı Kostantin zimmîden tahsîl ve merkūm Mehmed Şâkir Ağa’ya teslîm ettirilmek iktizâ eylediği İstanbul Mahkemesi’nden huzûr [-ı âlîlerine i‘lâm olundu.] Fî 4 Zilhicce sene 1236