İstanbul Mahkemesi 137 Numaralı Sicil (H.1236-1238 / M 1821-1822) cilt: 86, sayfa: 92 Hüküm no: 50 Orijinal metin no: [12a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Borcundan dolayı hapiste olan Tarandafila bt. Pavli’nin kefilsiz serbest bırakılması Mahbûsdan bilâ-kefîl ıtlâk Ma‘rûz[-ı dâ‘î-i devlet-i aliyyeleridir ki] İşbu arzuhâl hâmişinde mastûr derkenâr mantûkunca iki bin beş yüz guruş deyni içün işbu sene-i mübâreke şehr-i Rebî‘ülevvel’inden berü sicn-i sultânîde mahbûse olan mu‘arrefetü’ş-şahs Tarandafila bt. Pavli Nasrâniye Çarşamba günü arz odasında huzûr-ı lâmi‘u’n-nûr-ı hazret-i Sadr-ı a‘zamîde ma‘kūd meclis-i şer‘-i enverde dâyinesi Vasileke bt. Mihal v. Karagöz Nasrâniye tarafından husûs-ı âtîde vekâleti şahsını bilir Pavli v. Vasil zimmî ve Maryora bt. Panayot ve Odake bt. Manol Nasrâniyeler şehâdetleriyle sâbit olan müvekkile-i mersûmenin kız karındaşı mu‘arrefetü’ş-şahs Tarsi Nasrâniye muvâcehesinde ben müvekkile-i mersûmeye yedinde olan bir kıt‘a i‘lâm-ı şer‘î mantûkunca bâlâda mezkûr deynim içün târih-i mezkûrdan berü işbu köhne elbisemden mâ‘adâ ism-i mâl ıtlâk olunur nesneye mâlike olmayup bir vechile edâ-yı deyne kudretim olmamağla vakt-i yesârıma değin sebîlim tahliye olunması murâdımdır deyü asârını da‘vâ ve vekîl-i mersûma Tarsi Nasrâniye müdde‘iye-i mersûmenin yesârını iddi‘â etmemekle müdde‘iye-i mesfûrenin ber-minvâl-i muharrer asâr da‘vâsına lede’t-tezkiye adâletleri zâhir olan civârı sâkinlerinden hâline vukūfları olan Mehmed Emin Beşe b. Abdullah ve Hacı Şa‘bân oğlu es-Seyyid Ahmed Beşe b. es-Seyyid Hüseyin ve Ömer Beşe b. Abdullah şehâdet etmeleriyle asârı sâbit olmağın mûcebiyle müdde‘iye-i mersûmenin vakt-i yesârına değin bilâ-kefîl habsden ıtlâkı lâzım geldiği İstanbul Mahkemesi’nden huzûr [-ı âlîlerine i‘lâm olundu.] Fî 2 Za sene 1236