İstanbul Mahkemesi 137 Numaralı Sicil (H.1236-1238 / M 1821-1822) cilt: 86, sayfa: 96 Hüküm no: 55 Orijinal metin no: [13a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yusuf b. Süleyman’ın nizama aykırı davrandığından fesci esnaflığından çıkarıldığı Fescilerin nizâ‘ı Ma‘rûz[-ı dâ‘î-i devlet-i aliyyeleridir ki] Âsitâne-i aliyyede vâki‘ fesci esnâfının Kethüdâsı Kasım Ağa ve esnâfından Süleyman Ağa ve karındaşı Said Ağa ve Ahmed Ağa ve el-Hâc Yahya Ağa ve Mehmed Ağa ve Salih Ağa ve Mehmed Ağa ve diğer Said Ağa ve diğer Salih Ağa ve Ahmed Ağa ve âhar Said Ağa ve diğer Ahmed Ağa ve diğer Kasım Ağa ve karındaşı Yusuf Ağa ve el-Hâc Feyzullah Ağa ve âhar Said Ağa ve Salim Ağa ve Ömer Ağa ve diğer Ömer Ağa’dan her biri meclis-i şer‘-i münîrde esnâf-ı merkūmeden Yusuf b. Süleyman Yahlef muvâcehesinde merkūm Yusuf esnâfımızdan ve Tahtakale’de vâki‘ bizim mahsûs Çiçekçibaşı Hanı müstecirlerinden olup lâkin kendi hâlinde olmayup her bir husûsda esnâfımız ihtiyârlarına muhâlefet ve beynimizde düstûrü’l-amel olan nizâm-ı kadîmimizin ihtilâline bâ‘is ve ale’l-husûs bu esnâda han-ı mezkûr mutasarrıflarının bizimle beynimizde vâkı‘a olan nizâ‘ımız Çarşamba günü arz odasında bâ-irâde-i seniyye cümlemizin rızâmızla taht-ı râbıtaya idhâl olunmuşken merkūm Yusuf’un nizâm-ı mezkûru ifsâda sa‘y edüp âhar vechile bizi rencîde etmesi bi’l-vücûh kendisinden adem-i emniyetimize bâdî olduğundan merkūmdan müteneffirler olduğumuzdan bi’d-defa‘ât kendüye nush ve pend eylediğimizde kat‘â ısgā etmeyüp ızrârında ısrâr etmekle merkūmdan külliyen emn ve rahatımız meslûb olmuşdur deyü her biri bi’l-muvâcehe teşekkî derkâr-ı âhara meslûk edüp fîmâ ba‘d gerek fesci esnâflığından ve gerek han-ı mezkûrda vâki‘ sâkin olduğu odadan ihrâc olunması bâbında fermân-ı âlîşân sudûru niyâzında oldukları İstanbul Mahkemesi’nden [huzûr-ı âlîlerine i‘lâm olundu.] Fî 19 Za sene 1236