İstanbul Mahkemesi 137 Numaralı Sicil (H.1236-1238 / M 1821-1822) cilt: 86, sayfa: 97 Hüküm no: 56 Orijinal metin no: [13a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Demirci kazası zeametinin tahsilinde Abdülhalim Ağa b. Hacı Mustafa’nın Mehmed Emin Ağa’ya engel olduğu Ze‘âmet men nizâ‘ı Ma‘rûz[-ı dâ‘î-i devlet-i aliyyeleridir ki] Sâhib-i arzuhâl Göknüllü zü‘amâdan Abdülhalim Ağa b. el-Hâc Mustafa Çarşamba günü arz odasında huzûr-ı lâmi‘u’n-nûr-ı hazret-i Sadr-ı a‘zamîde ma‘kūd meclis-i şer‘-i enverde Anadolu’da Saruhan sancağında Demirci kazâsı vücûhundan arzuhâlde mezkûrü’l-ism el-Hâc Mehmed Ağa b. el-Hâc Ali mahzarında kazâ-i mezbûra tâbi‘ Romani karyesinde müstakillen ve kura-yı sâire hisse-i ma‘lûmesine müşteriklerimle iştirâken bâ-berât-ı âlîşân ve ber-mûceb-i defter-i Hâkānî ma‘lûmü’l-mikdâr yazu ile ber-vech-i ze‘âmet ben mutasarrıf olup ze‘âmet-i mezkûreyi zabt ve te‘ayyüş içün tarafımdan gāib ani’l-meclis Hamza’yı bin iki yüz otuz bir ve otuz iki senelerinde ve Abdülhamid Ağa’yı bin iki yüz otuz üç ve otuz dört senelerinde mahalline gönderdiğimde merkūm el-Hâc Mehmed Ağa a‘yânzâde olmak takrîbiyle ze‘âmet-i mezkûreyi sinîn-i merkūmede vekîllerime zabt ettirmeyip zikr olunan otuz bir ve otuz iki ve otuz üç ve otuz dört seneleriyle mukaddemâ bin iki yüz yirmi beş senesinde tegallüben kendi zabt ve te‘ayyüş ve hâsılâtını kabz edüp lâkin bana ve vekîllerime bir akçe vermeyüp gadretmiş olduğundan ben ze‘âmet-i mezkûreyi bin iki yüz otuz beş ve otuz altı senelerinde Saruhan sancağı mutasarrıfları hazerâtına ihâle ile hâsılâtından bedel-i iltizâm olarak senevî biner guruş ahz etmemle sinîn-i mezkûre hâsılâtından bedel olarak sene-i sâbıkāya kıyâsen zikr olunan beş sene içün beher sene biner guruşdan cem‘an [13b] mâlından bana beş bin guruş vermek üzere merkūm el-Hâc Mehmed Emin Ağa’ya cebr olunmak matlûbumdur dedikde istikşâf-ı hâl içün merkūm el-Hâc istintak olundukta cevâbında ben sinîn-i mezkûrede zikr olunan ze‘âmet husûsuna karışmadım ve ne vechile zabt olunduğuna mevkūfum? yokdur demekle ze‘âmet-i mezkûre sinîn-i mezkûrede sûrete zabt olunmuşdur ve hâsılâtı ne mikdâra bâliğ olmuşdur ve hâsılâtını kimler ahz etmişdir keyfiyeti ale’t-tafsîl mahallinde re’y-i hâkimü’ş-şer‘ ve vücûh-ı beldede vukūfları olan kimesneler ile alâ-vechi’s-sıhha tahkīk ve alâ-vukū‘ihi der-i devlet-medâra i‘lâm olunmak bâbında iktizâ edenlere hitâben fermân-ı âlîşân ısdâr ve irsâli tarafeyn iltimâsı ve re’y-i âlîleri inzımâmıyla istisvâb olunduğu İstanbul Mahkemesi’nden huzûr [-ı âlîlerine i‘lâm olundu.] Fî-gurre-i Zilhicce sene 1236