İstanbul Mahkemesi 137 Numaralı Sicil (H.1236-1238 / M 1821-1822) cilt: 86, sayfa: 98 Hüküm no: 57 Orijinal metin no: [13b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mahmud Ağa b. İsmail’in, Habibe Hatun bt. Abdullah’a karşı açtığı menzil davasında iddiasını ispat edemediğinden muarazadan men edildiği Menzil zabtı Ma‘rûz[-ı dâ‘î-i devlet-i aliyyeleridir ki] İstanbul’da Yusufpaşa Çeşmesi kurbünde Şîrmerd Çavuş Mahallesinde sâkine iken bundan akdem vefât eden es-Seyyid Mustafa b. es-Seyyid el-Hâc Ahmed b. Veliyüddin nâm kimesnenin verâseti zevce-i menkûha-i metrûkesi Habibe Hatun bt. Abdullah ile vâlidesi Âişe Hatun bt. Abdullah ve sulbiye kebîre kızları Şerîfe Fâtıma ve Şerîfe Atiyyetullah ve Şerîfe Âişe Hatunlara münhasıra ba‘dehû mezbûre Şerîfe Fâtıma Hatun dahi vefât edüp verâseti zevc-i metrûku Berber Mehmed Emin Ağa b. Abdullah ile vâlidesi mezbûre Habibe Hatun’a ve sadriye sagīre kızı Şerîfe Zeyneb ve li-ebeveyn kızkarındaşları mezbûretân Şerîfe Atiyyetullah ve Şerîfe Âişe Hatunlara münhasıra ba‘dehâ merkūme Şerîfe Âişe Hatun dahi vefât edüp vâlidesi mezbûre Habibe Hatun’a ve sadriye sagīre kızı Şerîfe Emine’ye ve li-ebeveyn kız karındaşı mezbûre Şerîfe Atiyyetullah Hatun’a ba‘de’l-inhisâr müteveffât-ı sâlise-i merkūme Şerîfe Âişe Hatun’un zevc-i mutallıkı ve kızı sagīre-i merkūme Şerîfe Emine’nin babası ve velîsi dikici esnâfından sâhib-i arzuhâl İbrahim Ağa b. Hüseyin meclis-i münîrde dâ‘îlerinde olan evkāfdan merhûm Kazganî Sadi Vakfı musakkafâtından zikri âtî bir bâb menzile bâ-temessük-ı mütevellî bi’l-icâreteyn mutasarrıfe olmağla vaz‘-ı yedi mütehakkık olan derûn-ı arzuhâlde mezkûretü’l-ism mu‘arrefetü’z-zât merkūme Habibe Hatun muvâcehesinde vakf-ı menzil mütevellîsi Mustafa Efendi b. Ali hâzır olduğu hâlde mahalle-i mezbûrede vâki‘ bir tarafdan Hüseyin Ağa ve bir tarafdan Derviş Efendi menzilleri ve bir tarafdan Haremeyni’ş-şerîfeyn vakfından müteveffâ-i evvel-i mezbûrun ile’l-vefât tasarrufunda olan bahçe ve bir tarafdan tarîk-i âm ile mahdûd [ve] ulyâda üç bâb oda ve abdesthâne ve kenîf ve vustâda kezâlik üç bâb oda ve abdesthâne ve kenîf ve süflâda bir matbah ve bir mağsel ve bir bi’r-i mâ ve bir mikdâr eşcâr-ı müsmireli bahçe ve sokak kapısını müştemil arsayı mahmiye-i mezbûrede merhûm Kazganî Sadi Mahallesi avârız vakfına senevî üç yüz altmış akçe mukāta‘a-i kadîmeli ve bi’l-cümle ebniye ve eşcârı mülk bir bâb menzil müteveffâ-i evvel-i mezbûrun hayâtında ile’l-vefât yedinde mülkü ve ba‘de vefâtihi müteveffât-ı sâniye-i merkūme Şerîfe Fâtıma Hatun’un zevc-i metrûku mezbûr Berber Mehmed Emin Ağa ile vâlidesi mezbûre Habibe Hatun’a ve sadriye sagīre kızı merkūme Şerîfe Zeyneb ve li-ebeveyn kız karındaşları merkūmetân Şerîfe Atiyyetullah ve müteveffât-ı sâlise-i merkūme Şerîfe Âişe Hatunlara bi-hükmi’l-münâsahati’ş-şer‘iyye mevrûs oldukdan sonra sagīre-i merkūme Şerîfe Zeyneb’in babası merkūm Berber Mehmed Emin Ağa kendi nefsinden asâleten ve velâyeten ve mezbûre Âişe Hatun tarafından vekâleti Ahmed Efendi b. Ahmed ve es-Seyyid el-Hâc Hüseyin Efendi b. Numan şehâdetleriyle sâbit olan İsmail Ağa b. Osman vekâleten ve mezbûrât Habibe ve Şerîfe Atiyetullah Hatunlar ve müteveffât-ı sâlise-i merkūme Şerîfe Âişe Hatun hayâtında asâleten her biri ber-vech-i muharrer irsen mâlikler oldukları menzil-i mahdûd-ı mezkûru bin iki yüz otuz dört senesi Saferi’l-hayrın yedinci günü târihiyle müverraha ve ol târihde kassâmü’l-askeri bulunan mevâlî-i izâmdan fazîletlü el-Hâc Mehmed Sâdık Efendi’nin imzâsıyla mümzât ve hatmiyle mahtûme olup mazmûnu lede’t-tezkiye adâletleri zâhir kapan-ı dakīk tüccârından Ahmed Ağa b. Ahmed ve mahalle-i mezbûre İmâmı es-Seyyid el-Hâc Ahmed Efendi b. es-Seyyid el-Hâc Hüseyin şehâdetleriyle mahzar-ı hasm-ı câhidde sâbit ve işbu meclis-i şer‘de feth ve kırâet olunan bir kıt‘a hüccet-i şer‘iyye nâtık olduğu üzere Mehmed Ağa ile İsmail’e bâ-sünûh-ı şer‘î semen-i misli olan bin yedi yüz guruş semen-i medfû‘ ve makbûza bey‘ ve temlîk ve teslîm ol dahi ba‘de’l-iştirâ ve’t-temellük ve’t-tesellüm mezbûr Mehmed Ağa ber-vech-i muharrer mâlik olduğu menzil-i mahdûd-ı mezkûru mezbûre Habibe Hatun’a kezâlik bin yedi yüz guruş semen-i medfû‘ ve makbûza bey‘ ve temlîk ve teslîm ol dahi ber-vech-i muharrer iştirâ ve temellük ve tesellüm ve kabûl ettikden sonra mezbûre Habibe Hatun menzil-i mezkûrun mecmû‘unu vakf-ı mezbûra akār olmak üzere mütevellî-i merkūma bey‘ ve bin yedi yüz guruş mu‘accele ve senevi üç yüz altmış akçe üzerine yüz yirmi akçe dahi zamla cem‘an dört yüz seksen akçe ile istîcâr mütevellî-i merkūm dahi mezbûre Habibe Hatun’a îcâr ve ol vechile mezbûre Habibe Hatun vakfiyet üzere mutasarrıfe olup lâkin müteveffât-ı sâlise-i merkūme Şerîfe Âişe Hatun ber-vech-i muharrer menzil-i mezkûrda olan hissesini hayâtında ber-mûceb-i hüccet-i mezkûre hâkim-i mûmâ-ileyh huzûrunda bey‘ eylediği hînde mecnûne olduğundan bey‘i sahîh olmamağla menzil-i mezkûrda zevce-i mutallakam [14a] müteveffât-ı sâlise-i merkūme Şerîfe Âişe Hatun’un bi-tarîkı’l-münâsahati’ş-şer‘iyye hisse-i irsiyyesinden oğlum sagīr-i merkūmun hissesini vâlidesi merkūma mevrûs mülkü olmak üzere oğlum sagīr-i merkūm içün bi’l-velâye zabt murâdımdır deyü da‘vâ ettikte sagīr-i merkūmun min-kıbeli’l-üm ceddesi merkūme Habibe Hatun cevâbında menzil-i mahdûd-ı mezkûra vech-i meşrûh üzere el-yevm bâ-temessük-ı mütevellî bi’l-icâreteyn mutasarrıf olmağla vaz‘-ı yedini mütevellî-i hâzır-ı merkūm tasdîkiyle ikrâr lâkin kızım müteveffât-ı sâlise-i merkūme hayâtında ve kemâ[l]-i sıhhatinde menzil-i mahdûd-ı mezkûrda olan hisse-i mezkûresini merkūm Mahmud Ağa b. İsmail’e hâkim-i mûmâ-ileyh huzûrunda benimle sâir müşterikleri ile ma‘an bey‘ ettikte kendisinde eser-i cünûn olmayup âkıle ve cemî‘ tasarrufât-ı şer‘iyyesi nâfize olduğu hâlde bey‘ ve teslîm etmişidi deyü müdde‘î-i mezbûrun inkârına mukārin mütevellî-i hâzır-ı merkūm ile ma‘an da‘vâ ve bu sûretde akl-ı beyyinesi evlâ olmağın müteveffât-ı sâlise-i merkūme Şerîfe Âişe Hatun bt. el-müteveffâ es-Seyyid Mustafa Efendi b. es-Seyyid el-Hâc Ahmed b. Veliyüddin menzil-i mahdûd-ı mezkûrda babası müteveffâ-i merkūmdan bi-tarîkı’l-münâsaha kendisine mevrûs olan hisse-i mezkûresini merkūm Mahmud Ağa b. İsmail’e hîn-i bey‘inde âkıle ve cemî‘ tasarrufât-ı şer‘iyyesi nâfize olduğuna hâline vukūf-ı tâmları olan merkūmân Ahmed Ağa b. Ahmed ve İmâm es-Seyyid el-Hâc Ahmed Efendi b. es-Seyyid el-Hâc Hüseyin bi’l-muvâcehe vech-i vecih-i şer‘î üzere edâ-yı şehâdet-i şer‘iyye etmeleriyle mûcebiyle ba‘de’l-hükm menzil-i mahdûd-ı mezkûru kemâkân mütevellî-i merkūm re’yiyle merkūme Habibe Hatun’un bi’l-icâreteyn zabt ve tasarrufu iktizâ eylediği müdde‘î-i merkūma tefhîm ve da‘vâ-yı mezkûresiyle merkūme Habibe Hatun’a bî-vech mu‘ârazadan men‘ olunduğu İstanbul Mahkemesi’nden huzûr [-ı âlîlerine i‘lâm olundu.] Fî 26 Za sene 1236