İstanbul Mahkemesi 137 Numaralı Sicil (H.1236-1238 / M 1821-1822) cilt: 86, sayfa: 100 Hüküm no: 58 Orijinal metin no: [14a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ahıskalı Seyyid Salih Beşe b. Mahmud’un, Hüseyin Beyefendi b. Süleyman’a olan borcunu ödemeyi kabul ettiği Çiftlikât mesâlihi Ma‘rûz[-ı dâ‘î-i devlet-i aliyyeleridir ki] Zikri âtî husûsu mahallinde ketb ü tahrîr ve istimâ‘ ve fasl ü hasm içün savb-ı şer‘-i enverden bi’l-iltimâs me’zûnen irsâl olunan başkâtib Mevlânâ İbrahim Ârif Efendi dâ‘îleri İstanbul’da Davudpaşa Mahallesinde vâki‘ sâbıkā ser-çukadâr-ı hazret-i şehriyârî Hüseyin Beyefendi b. Süleyman’ın menziline varup huzûr-ı Müslimînde ba‘de akdi’l-meclis mûmâ-ileyh Hüseyin Bey meclis-i ma‘kūd-ı mezkûrda kıl‘a-ı hâkānîden İrva Kalesi neferâtından ve dergâh-ı âlî yeniçerilerinin yirmi beşinci cema‘at yoldaşlarından Ahıskavî es-Seyyid Salih Beşe b. es-Seyyid Mahmud mahzarında mezbûr es-Seyyid Salih Beşe bin iki yüz otuz dört senesi Zilka‘desi gurresinde kibâr-ı müderrisîn-i kirâm-ı zevi’l-ihtirâmdan Şerîf Efendizâde fazîletlü Mehmed Şerîf Efendi’nin mutasarrıf oldukları medîne-i Üsküdar’a muzâfe Yoros nâhiyesine tâbi‘ İrva Deresi kenarında kâin Çavuşlu ve İşenceli? ve Yeni Çiftlik demekle ma‘lûm üç kıt‘a çiftlikâtı istîcâra tâlib olup lâkin efendi-i mûmâ-ileyh çiftlikât-ı mezkûreyi mezbûr es-Seyyid Salih Beşe’ye îcâr etmeyüp şehr-i mezbûr gurresinden icâre-i ma‘lûme ile bana îcâr ve derûnunda mevcûd demirbaş tâ‘bir olunur işbu yedimde olan mühürlü temessük ve defter-i müfredât mantûkunca ma‘lûmü’r-ruûs hayvânât ve ma‘lûmü’l-kiyel hubûbât ve kovan ve ma‘lûmü’l-hudûd âlât-ı çift ve eşyâ ve evânî-i nuhâsiyeyi cem‘an on altı bin guruş semen tesmiyesiyle nesne bana bey‘ ve teslîm ben dahi ba‘de’l-iştirâ ve’t-tesellüm mezbûr es-Seyyid Salih Beşe’ye yine on altı bin guruş semen tesmiyesiyle nesne bey‘ ve teslîm ol dahi ba‘de’l-iştirâ çiftlikât-ı mezkûreye varup tamamen kabz eyledikden sonra merkūm es-Seyyid Salih Beşe çiftlikât-ı mezkûrenin müstecir-i sâbıkı olan gāib ani’l-meclis Haraccızâde Şâkir Bey’in gayr-ez-demirbaş çiftlikât-ı mezkûre derûnlarında kendi mâlı olan ma‘lûmü’r-ruûs hayvânât ve ma‘lûmü’l-kiyel hubûbât ve kovan ve nısf sefînesini cem‘an on sekiz bin dokuz yüz dört buçuk guruşa iştirâ ve kabz edüp ve merkūm Şâkir Bey’in çiftlikât-ı mezkûre mutasarrıfı efendi-i mûmâ-ileyh zimmetinde zuhûr edüp merkūm es-Seyyid Salih Beşe’nin bi-tarîkı’l-havâle efendi-i mûmâ-ileyhden kabzla zimmetine ta‘alluk eden bin beş yüz altmış yedi buçuk guruş ki min-haysü’l-mecmû‘ mezbûr es-Seyyid Salih Beşe’nin gāib-i merkūm Şâkir Bey’e yirmi bin dört yüz yetmiş iki guruş deyni olmağla deyn-i mezkûrdan edâ etmek üzere gāib-i mezbûr Şâkir Bey’in merkūm es-Seyyid Salih Beşe üzerine havâle eylediği gāibûn ani’l-meclis Abdürrezzak-zâde Said Efendi merkūmun eytâmı vasîsine sekiz bin altı yüz yetmiş beş guruş ve Musa Usta’ya dört bin beş yüz guruş ve Tatar es-Seyyid Mehmed Reis b. Mustafa’ya üç bin altı yüz kırk guruş ve Mehmed Reis b. Mehmed’e bin guruş ki cem‘an on yedi bin sekiz yüz on beş guruş ben merkūm es-Seyyid Salih Beşe’nin bi-şartü’r-rücû‘ emriyle gāibûn-ı merkūmûna edâ ve çiftlikât-ı mezkûre hademeleri olup mezbûr es-Seyyid Salih Beşe’nin dâyinleri olan kezâlik gāibûn ani’l-meclis Korucu Abdurrahman b. Ahmed’e yüz doksan guruş ve Meremmâtçı es-Seyyid Mustafa b. Ahmed’e yüz elli guruş ve Sığırtmac es-Seyyid Yusuf b. es-Seyyid Ebûbekir’e iki yüz guruş ve Odacı Mehmed Emin b. Salih’e iki yüz kırk beş guruş ve Çiftçibaşı Veliyüddin b. Hasan’a iki yüz seksen beş guruş ve Çiftçi Abdi b. İsmail’e yüz on guruş ve Çiftçi Mustafa b. Ahmed’e yüz doksan guruş ve Çiftçi Hüseyin b. Ahmed’e iki yüz kırk guruş ve Çiftçi Hayrullah b. Osman’a yüz beş guruş ve Çiftçi Molla Yusuf b. Hasan’a yüz doksan yedi buçuk guruş ve Çiftçi Mehmed b. Abdurrahman’a yüz elli dört guruş ve Oduncu es-Seyyid Osman b. Mehmed’e [14b] yüz kırk guruş ve Oduncu Osyan v. Nikola zimmîye yüz yetmiş guruş ve Oduncu Nikola v. Yoyo zimmîye yüz yetmiş yedi guruş ve Oduncu Kabadayı Nikola v. Anaştaş zimmîye iki yüz on guruş ki cem‘an üç bin üç yüz altmış buçuk guruş dahi ben merkūm es-Seyyid Salih Beşe’nin kezâlik bi-şartü’r-rücû‘ emriyle gāibûna edâ etmemle ol vechile mezbûrun zimmetinde bi’l-mürâca‘a alacağım olan yirmi bir bin yüz yetmiş sekiz buçuk guruş ve çiftlikât-ı mezbûre icârelerinden işbu sene-i mübâreke Şevvâli gāyetine gelince gayr-ez teslîmât sahhe’l-bâkī zimmetinde kalan üç bin dokuz yüz otuz iki buçuk guruş ve mâlımdan mezbûra ikrâz ve teslîm eylediğim bin sekiz yüz yetmiş üç buçuk guruş ve kezâlik mezbûrun bi-şartü’r-rücû‘ emriyle mâlımdan kumanya tâ‘bir olunur çiftlikât-ı mezbûrede me’kûlâtına masrûfum olup bi’l-mürâca‘a hakkım olan iki yüz elli guruş ki min-haysü’l-mecmû‘ yirmi yedi bin iki yüz otuz dört buçuk guruşun yüz yetmiş beş guruşunu gāib ani’l-meclis Molla İbrahim yediyle bana edâ ve altı yüz guruşunu dâyini kezâlik gāib ani’l-meclis Süleyman Çavuş’a havâle etmek üzere kabûlü hâvî havâle edüp ve yüz kırk bir guruşuna takāsen mezbûrdan seksen üç vakıyye soğan ve altı yüz vakıyye otlak ve beş yüz vakıyye kömür ve dört çeki hatab iştirâ ol vechile cem‘an dokuz yüz on altı guruşunu istîfâ etmemle bâkīsi olan yirmi altı bin üç yüz on sekiz buçuk guruşu bana edâya ve bâlâda mezkûr nesne bey‘ eylediğim demirbaş tâ‘bir olunan ber-mûceb-i defter-i müfredât hayvânât ve hubûbât ve kovan ve âlât-ı çift ve eşya ve evânî-i nuhâsiye husûsunda bey‘i bi’t-terâzî ikāle etmemizle hayvânât ve hubûbât ve kovan ve âlât-ı çift ve eşya ve evânî-i nühasiyye-i ma‘lûmeler dahi bi-a‘yânihâ mahallinde benim içün işbu hâzır bi’l-meclis vekîl nasbeylediğim Kapıkethüdâsı Musa Ağa b. Mehmed’e teslîme mezbûr es-Seyyid Salih Beşe’ye tenbîh olunmak matlûbumdur deyü da‘vâ eylediğini Mevlânâ-yı mezbûr dâ‘îleri ma‘an meb‘ûs ümenâ-i şer‘le meclis-i şer‘a gelüp müdde‘î-i mûmâ-ileyh Hüseyin Bey tarafından vekîl-i müsecceli merkūm Musa Ağa ve mezbûr es-Seyyid Salih Beşe muvâcehelerinde ba‘de’l-inhâ vekîl-i merkūm Musa Ağa meblağ-ı bâkī-i mezbûr yirmi altı bin üç yüz on sekiz buçuk guruşu mezbûr es-Seyyid Salih Beşe’den huzûrumuzda dahi bi’l-vekâle da‘vâ ve mezbûr es-Seyyid Salih Beşe cevâbında kaziyye minvâl-i meşrûh üzere olduğunu bi-tamâmihâ tâyi‘an ve kat‘iyyen ikrâr u i‘tirâf-birle müvekkil-i mûmâ-ileyhe ber-vech-i muharrer ibkāya ta‘ahhüd eylediği İstanbul Mahkemesi’nden huzûr [-ı âlîlerine i‘lâm olundu.] Fî 9 Zilhicce sene 1236