İstanbul Mahkemesi 137 Numaralı Sicil (H.1236-1238 / M 1821-1822) cilt: 86, sayfa: 113 Hüküm no: 78 Orijinal metin no: [17a-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fırıncı esnâfı ile bakkāl esnafının ekmek satışı konusundaki nizamları Habbâzân esnâfıyla bakkālânın nân-ı azîz tanzîmi Ma‘rûz[-ı dâ‘î-i devlet-i aliyyeleridir ki] Ashâb-ı arzuhâl Havâss-ı Refî‘a kazâsına muzâfe Hasköy bakkāllarından Oron Vehayib ve Kemal ve Avram ve Davit ve Yako ve Mosi ve Salti ve Yaşova ve Mişon ve Yasef ve diğer Yako ve İsak ve diğer Avram ve Salamon ve Markadov ve Pers ve Aslan ve Yuda nâm Yahûdi meclis-i şer‘-i münîrde kasaba-i mezbûrede vâki‘ Kızılminâre nâm mahalde el-Hâc Halil fırınının ekmekçisi arzuhâlde mastûrü’l-ism Ali Ağa b. Mehmed Sâdık mahzarında ekmekçi esnâfının kethüdâsı Mehmed Ağa ile Südlüce ekmekçisi Haçok ve nizâm ustalarından mazbûtü’l-esâmî zimmîler hâzır oldukları hâlde fırın-ı mezkûr bundan akdemce muhterik [17b] oldukda biz mütemekkinler olduğumuz bakkāl dükkânlarına nân-ı azîzi İstanbul’da Balat fırınından ve mahall-i sâireden getirüp ondalığını yüz on hesâbınca ahz edegelürken bu esnâda merkūm Ali Ağa fırın-ı mezkûru inşâ ettiğine binâen bizi âhar fırınlardan ekmek almakdan men‘ eylediğinden başka kendi fırınından aldığımız nân-ı azîzin semenini kendüye verdiğimizde bize beher yüz akçede altı akçe bırakıp ziyâde vermediğinden bizim tüccârımızın noksanına bâ‘is olur deyü bi’l-muvâcehe teşekkî ettiklerinde merkūm Ali Ağa cevâbında yedimde olup bâlâsı mübârek hatt-ı hümâyûn-ı şevket-makrûn ile muveşşah ve bin iki yüz yirmi dört senesi ile müverrah bir kıt‘a fermân-ı âlîşân mantûkunca kasaba-i Hasköy’de ekmekçi fırınlarında tabh olunan nân-ı azîz kasaba-i mezbûre dükkânlarında bey‘ olundukta beher yüz akçeliğinde bey‘ edenlere altışar akçe ücret verilmek ve emlâk-ı hümâyûndan olup Alibey karyesinde vâki‘ ekmekçi fırını icâresi Hasköy ekmekçileri ustalarına tahmîl olunmağla kasaba-i mezbûrede tabh olunan nân-ı azîz has ve tammü’l-vezn olup cümle ahâlîye kâfi olmağla mukābelesinde müceddeden fırın ihdâsı ve Balat ve Ayvansaray ve Kasımpaşa ve Kulaksız ve Azabkapısında ve sâir mahallerde tablakârlar ve ba‘zı dükkânda ve attâr dükkânında nân-ı azîz füruht olunması bin yüz elli senesinden berü i‘tâ buyrulan müte‘addid evâmir-i aliyye mûceblerince memnû‘ olmağla ben dahi işbu bakkālân tâifesine dükkânlarında bey‘ içün fırın-ı mezkûrdan verdiğim nân-ı azîz semenini beher yüz akçesine altı akçesini ondalık nâmıyla terk edegelmişimdir deyüp ve mazmûnu takrîrine mutâbık ibrâzıyla emr-i âlîşân-ı mezkûrun mazmûnu bakkālân-ı mersûmûna tefhîm olundukta her biri ber-mûceb-i emr-i âlî amel ve harekete ta‘ahhüd eyledikleri İstanbul Mahkemesi’nden huzûr-ı âlîlerine i‘lâm olundu. Fî 25 Zilhicce sene 1236