İstanbul Mahkemesi 137 Numaralı Sicil (H.1236-1238 / M 1821-1822) cilt: 86, sayfa: 114 Hüküm no: 79 Orijinal metin no: [17b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Seyyid Seyfullah’ın, Abdullah Ağa b. Mustafa’ya olan borcunu kefili Mehmed Himmet Ağa’nın ödemesi gerektiği Mekfûlün-bihe hüküm Ma‘rûz-ı dâ‘î-i devlet-i aliyyeleridir ki İstanbul cizyedârı tarafından Edirnekapısı’nda cizye cibâyetine memûr sâhib-i arzuhâl Abdullah Ağa b. Mustafa meclis-i şer‘-i münîrde derûn-ı arzuhâlde mezkûrü’l-ism Uşaklı es-Seyyid Mehmed Himmet Ağa b. Hüseyin mahzarında yedimde olup bin iki yüz otuz beş senesi Recebi’l-ferdinin yedinci günü ile müverrah ve Balat mahkemesi sicilinde mukayyed bir kıt‘a i‘lâm mantûkunca gāib ani’l-beled Cüzdâncı es-Seyyid Seyfullah b. es-Seyyid Mustafa b. Abdullah’a sene-i mezkûreye mahsûben ehl-i zimmet re‘âyâsına tevzî‘ içün verdiğim yüz on a‘lâ ve yüz evsat ve on dokuz ednâ cizye evrâkını ma‘lûmü’l-esâmî re‘âyâya tevzî‘ ve mâl-ı cizyeleri olan cem‘an iki bin altı yüz otuz altı guruşu izin ve tevkîlimle tahsîl edüp lâkin bana vermeyüp umûruna sarfla zimmetine ta‘alluk eylediği ikrârıyla zâhir olup ve ben meblağ-ı mezkûru gāib-i merkūmdan bi’l-mevriyye taleb eylediğimde ikrâr ve bana edâya ta‘ahhüd ettikden sonra merkūm es-Seyyid Mehmed Himmet Ağa yedime verdiği temessük mantûkunca meblağ-ı mezbûr iki [bin] altı yüz otuz altı guruşa [sene-i] merkūme Ramazanı gurresinden beher şehr onar guruş vermekle mecmû‘unu iki yüz altmış üç buçuk ay tamamına değin edâ etmek üzere gāib-i mezbûrun emr-i iltimâsıyla kefîl oldukdan sonra meblağ-ı musakkat-ı [mukassat-ı] mekfûlün-bih-i mezkûrdan işbu târih-i i‘lâma gelince on beş ayda müctemi‘ olan yüz elli guruşun yirmi beş guruşunu bana teslîm etmekle bâkīsi olan iki bin altı yüz on bir guruşun dahi yüz yirmi beş guruşunu taksîtleri hulûlüne binâen hâlâ ve mâ‘adâsını taksîtleri hulûlünde kefâlet-i mezkûresine mebnî bana mâlından teslîme ta‘ahhüd eyledi dediğini merkūm es-Seyyid Mehmed Himmet Ağa tasdîk eylediği İstanbul Mahkemesi’nden huzûr [-ı âlîlerine i‘lâm olundu.] Fî 25 Z sene 1236