İstanbul Mahkemesi 137 Numaralı Sicil (H.1236-1238 / M 1821-1822) cilt: 86, sayfa: 115 Hüküm no: 80 Orijinal metin no: [17b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Uncu Agob v. Toma’nın, Mirahor’daki un değirmeni gediğini Seyyid İsmail Ağa b. Mehmed Emin’e sattığı Uncu değirmen Ma‘rûz-ı dâ‘î-i devlet-i aliyyeleridir ki Âsitâne-i aliyyede vâki‘ uncu esnâfından Agob v. Toma nâm zimmî meclis-i şer‘-i münîrde bâ‘isü’l-i‘lâm es-Seyyid İsmail Ağa b. es-Seyyid Mehmed Emin Ağa tarafından husûs-ı âtîde tasdîka vekîli habbâzân kethüdâsı Mehmed Ağa b. Ali mahzarında takrîr-i kelâm edüp İstanbul’da Mirahor uncu değirmeni derûnunda mevcûde beyne’l-hiref gedik tâ‘bir olunur yirmi dört re’s bârgir ve altı guruş uncu değirmeninden akd-i âti’z-zikrin sudûruna değin yedimde mâlım ve mülküm olan on iki re’s bârgir ve ona isâbet eden sâir âlât-ı lâzıme-i ma‘lûmeden ancak bir horos dört re’s bârgirimi bâtten ve sahîhan bi-safkatin vâhidetin müvekkil-i merkūm es-Seyyid İsmail Ağa’ya iki bin iki yüz guruş semen-i medfû‘a ve makbûza bey‘ ve temlîk ve vech-i lâyıkı üzere teslîm eylediğimde ol dahi ber-vech-i muharrer iştirâ ve temellük ve tesellüm ve kabz ve kabûl ettikden sonra mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini kabûlü hâvî ibrâ-i âmm-ı sahîh-i şer‘î ile ibrâ ve iskāt eyledik fîmâ ba‘d sâlifü’l-beyân bir horos dört re’s bârgir ve ona isâbet eden sâir âlât-ı lâzıme-i ma‘lûmede benim aslâ ve kat‘â alâka ve medhalim kalmayup müvekkil-i merkūm es-Seyyid İsmail Ağa’nın mülk-i müşterâsı olmuşdur deyü ba‘de’l-ikrâr ve’t-tasdîk müvekkil-i merkūm es-Seyyid İsmail Ağa’nın ânifen iştirâ eylediği bir horos dört re’s bârgir ve ona isâbet eden gedik âlât-ı lâzımesini mahrûse-i Galata’ya muzâfe kasaba-i Kasımpaşa’da zindân ardında [18a] vâki‘ iki horoslu bir bâb uncu değirmenine nakl ile mahâll-i evvel-i merkūmdan ref‘ ve mahâll-i sâni-i mezbûrda üç horos ve on iki re’s bârgir olmak üzere kayd ve müvekkil-i merkūm ismine tasrîhan kaleminden yedine bir kıt‘a sûret i‘tâsını istid‘â ettikte fi’l-hakīka esnâf-ı merkūmenin bu makūle gedik nakli mer‘î ve mu‘teber şürût-ı nizâmlarından olduğunu uncular kethüdâsı Mehmed Ağa ve sâir mazbûtü’l-esâmî nizâm ustaları ihbâr etmeleriyle bu sûretde müvekkil-i merkūm es-Seyyid İsmail Ağa’nın istid‘âsı vech üzere nakl ile ismine tasrîhan kayd-birle kaleminden yedine bir kıt‘a sûret verilmek iktizâ eylediği İstanbul Mahkemesi’nden huzûr [-ı âlîlerine i‘lâm olundu.] Fî 16 Z sene 1236