İstanbul Mahkemesi 137 Numaralı Sicil (H.1236-1238 / M 1821-1822) cilt: 86, sayfa: 116 Hüküm no: 81 Orijinal metin no: [18a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Aleksan, Kaspar, Anbersom ve Begos’un müştereken malik oldukları değirmeni çınar dibindeki ekmek fırınına nakletmeleri Ayvansaray’da bir bâb değirmen Ma‘rûz[-ı dâ‘î-i devlet-i aliyyeleridir ki] İstanbul’da Ayvansaray kurbünde Semercioğlu değirmeni derûnunda mevcûde beyne’l-esnâf gedik tâ‘bir olunur on iki re’s bârgir ve üç horos uncu değirmeninden dört re’s bârgir ve ona isâbet eden sâir âlât-ı lâzıme-i ma‘lûmenin sülüs hissesinin iştirâken mâlikleri Aleksan ve Kaspar ve Anbersom ve Begos zimmîler taraflarından husûs-ı âtîde vekîl-i şer‘îleri ve mersûmûnun babaları Merkel zimmî meclis-i şer‘-i münîrde habbâzân esnâfının kethüdâsı Mehmed Ağa ve ustalarından Ömer Ağa ve Osman Ağa ve Fazlı ve Molla Receb ve uncular kethüdâsı Mehmed Ağa ve mazbûtü’l-esâmî nizâm ustaları hâzır oldukları hâlde bi’l-vekâle takrîr-i kelâm edüp müvekkillerim mersûmûndan ber-vech-i muharrer zikr olunan Semercioğlu değirmeni derûnunda mevcûde âlât-ı gedik-i mezkûrdan mâlikler oldukları dört re’s bârgir ve bir horos ve onlara isâbet eden gedik âlât-ı lâzımesini fırın-ı mezkûrdan çınar dibinde vâki‘ ekmekçi fırınına nakl ile mahâll-i evvel-i merkūmdan ref‘ ve mahâll-i sâni-i mezbûrda dört re’s bârgir ve bir horos olmak üzere kayd-birle zimmîyyun-ı mersûmûnun isimlerine tasrîhan kaleminden yedlerine sûret i‘tâsı bi’l-vekâle istid‘â ve fi’l-hakīka esnâf-ı merkūmenin bu makūle gedik nakli mer‘î ve mu‘teber şürût-ı nizâmlarından olduğunu kethüdâ ustalar[ı] merkūmûn ihbâr etmeleriyle bu sûretde mersûmûn Aleksan ve Kaspar ve Anbersom ve Begos zimmîlerin istid‘âları üzere nakl ve isimleri tasrîhiyle kayd-birle kaleminden yedlerine sûret i‘tâsı iktizâ eylediği İstanbul Mahkemesi’nden huzûr [-ı âlîlerine i‘lâm olundu.] Fî 16 Z sene 1236