İstanbul Mahkemesi 137 Numaralı Sicil (H.1236-1238 / M 1821-1822) cilt: 86, sayfa: 117 Hüküm no: 82 Orijinal metin no: [18a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hüsrevoğlu Hacı Hasan Ağa’nın ismine kayıtlı olan bir bâb tütüncü gediğinin Habibe ve Fâtıma Hatunların ismine kaydedilmesi Tütüncü gediği Ma‘rûz[-ı dâ‘î-i devlet-i aliyyeleridir ki] İstanbul’da Zindânkapısı dâhilinde tahmîs kurbünde vâki‘ tarafeyni Küçük el-Hâc Ali Ağa ve Keleş el-Hâc Ahmed Ağa mahzenleri ve taraf-ı sâlisi tarîk-i âm ile mahdûd maden kaleminde Hüsrevoğlu el-Hâc Hasan ismine mukayyed bir bâb tütüncü mahzeni derûnunda mevcûde beyne’l-hiref gedik tâ‘bir olunan âlât-ı lâzıme-i ma‘lûmenin nısf hissesi müteveffâ Benli es-Seyyid Mustafa Ağa b. Hasan zevcesi Habibe Hatun bt. el-Hâc Halil’in ve nısf hissesi müteveffâ-i merkūmun li-ebeveyn kız karındaşı Fâtıma Hatun’un irsen ve şirâen yedlerinde mâlları olduğu esnâf-ı merkūmenin kethüdâ vekîli es-Seyyid Mustafa Ağa b. Ahmed ve Yiğitbaşısı es-Seyyid Abdullah Çelebi ve mazbûtü’l-esâmî Müslim ustaları ihbârlarıyla zâhir ve mütehakkık oldukdan sonra zâtları mu‘arrefeler merkūmetân Habibe ve Fâtıma Hatunlar meclis-i şer‘-i münîrde her biri takrîr-i kelâm edüp âlât-ı gedik-i mezkûr kaleminde el-yevm mâlik-i esbakı olan merkūm Hüsrev[oğlu] el-Hâc Hasan ismine mukayyed ise de müddet-i medîdeden berü tedâvül-i eyâdî ile tasarruf olunarak hâlâ irsen ve şirâen bi’l-münâsafa yedimizde mâlımız olmağla kaleminde mâlik-i esbakı merkūm Hüsrevoğlu el-Hâc Hasan ismine muharrer olan kayd-ı atîki ref‘ ve ilgā-birle bizim ismimize kayd ve ismimiz tasrîhiyle yedimize başka başka müceddeden sûret i‘tâsı bâbında fermân-ı âlîşân ısdârı niyâzımızdır deyü istid‘â eylediklerinde kethüdâ ve hâzirûn-ı merkūmû[n] her biri dahi âlât-ı gedik-i mezkûr vech-i meşrûh üzere merkūmetânın yedlerinde mâlları olduğunu ve bu makūle mâlik-i sâbıkı üzerine mukayyed olan gediğin kaydı kaleminden terkīn ile hâlâ mâliki üzerine kayd ile yedlerine sûret i‘tâsı şürût-ı nizâmlarından olduğunu dahi ihbâr etmeleriyle bu sûretde gedik-i merkūmu kaleminden Hüsrevoğlu el-Hâc Hasan Ağa ismine olan kaydı terkīn ve mezbûretân Habibe ve Fâtıma Hatunlar isimlerine tashîhan kayd-birle yedlerine başka başka müceddeden sûret verilmek iktizâ eylediği İstanbul Mahkemesi’nden huzûr [-ı âlîlerine i‘lâm olundu.] Fî 25 Z sene 1236