İstanbul Mahkemesi 137 Numaralı Sicil (H.1236-1238 / M 1821-1822) cilt: 86, sayfa: 117 Hüküm no: 83 Orijinal metin no: [18a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kosdi v. Anderya’nın, Yedikule’deki kasap dükkânı gediğini Todori v. Toma’ya devrettiği Kassabân gediği Ma‘rûz[-ı dâ‘î-i devlet-i aliyyeleridir ki] Hüdâvendigâr-ı esbak cennet-mekân firdevs-âşiyân merhûm ve mağfiret-nişan Sultan Abdülhamid Hân -sallet aleyhi sicâlü’l-ukūd ve’l-gufrân- hazretlerinin evkāf-ı hümâyûnlarından İstanbul’da Yedikule hâricinde vâki‘ gayr-ez selhhâne-i mîrî on aded ganem selhhânelerinden üçüncü selhhâneye merbût olup İstanbul’da Sultan Ahmed Han -tâbe serâhu- hazretlerinin Câmi‘-i şerîfi kurbünde Atmeydanı’nda çınar dibinde vâki‘ bir bâb kasab dükkânı derûnunda mevcûde beyne’l-esnâf gedik tâ‘bir olunur âlât-ı lâzıme-i ma‘lûmenin iki kıt‘a mütevellî temessükleri mantûklarınca mutasarrıfı kasab suyolcu Kosdi v. Anderya zimmî [18b] meclis-i şer‘-i münîrde hâlâ hâssa kasabbaşısı hâcegân-ı dîvân-ı hümâyûndan es-Seyyid Ali Efendi tarafından mürsel kasablar kethüdâsı el-Hâc Hasan Ağa ve kasab ustalarından mazbûtü’l-esâmî kimesneler hâzır oldukları hâlde kasab ustalarından bâ‘isü’l-i‘lâm Todori v. Toma zimmî muvâcehesinde zikr olunan bir bâb kasab dükkânı derûnunda mevcûde âlât-ı lâzıme-i ma‘lûmenin mecmû‘unu bedel-i ma‘lûm ve makbûz mukābelesinde ferağ-ı kat‘i-i mu‘teber ile bâ-re’y-i mütevellî mersûm Todori zimmîye ferağ ve tefvîz eylediğimde ol dahi tefevvüz ve kabûl edüp fîmâ ba‘d âlât-ı lâzıme-i mezkûrenin mecmû‘unda benim aslâ ve kat‘â alâka ve medhalim kalmayup mersûm Todori zimmînin hakk-ı müfevvezi olmuşdur dedikde mersûm Todori zimmî [ba‘de]’t-tasdîk mecmû‘-ı âlât-ı lâzıme-i ma‘lûme mesfûr Kosdi zimmînin ferağından kendi üzerine tahrîr defter-i vakfa kayd ve yedine taraf-ı vakıfdan bir kıt‘a temessük i‘tâ buyrulmak iktizâ eylediği İstanbul Bâb mahkemesinden huzûr [-ı âlîlerine i‘lâm olundu.] Fî 25 Z sene 1236