İstanbul Mahkemesi 137 Numaralı Sicil (H.1236-1238 / M 1821-1822) cilt: 86, sayfa: 122 Hüküm no: 86 Orijinal metin no: [19b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yohana Merkato Yahûdi’nin, Müslüman olarak kendisinden ayrılan eşi Maryana bt. Avram’a olan mehir borcunu ödemesi gerektiği İki yüz elli guruşa sulh Ma‘rûz[-ı dâ‘î-i devlet-i aliyyeleridir ki] Hasköy mütemekkinlerinden Dülger Yohana Merkato v. Mordehay Yahûdinin zevce-i medhûlün-bihası olup ismi Maryana bt. Avram iken işbu târih-i i‘lâmdan bir gün mukaddem Bâb-ı âlide bi-hidâyetillahi te‘âlâ cemî‘ edyân-ı bâtıladan teberrî ve ityân-ı kelimeteyn-i şehâdeteyn edüp şeref-i İslâmla müşerrefe olduğu ikrârıyla şer‘an mütehakkık olan zâtı mu‘arrefe Fâtıma nâm mühtedîye hatun meclis-i şer‘-i münîrde zevci mersûm Yohana Merkato Yahûdi muvâcehesinde mühtedîye-i merkūme Fâtıma Hatun talebiyle zevci mersûm Yohana Merkato Yahûdiyle vech-i şer‘î üzere İslâm teklîf olundukta her birinde ibâ ve küfrü üzerine ısrâr etmesiyle âyînleri üzere beynlerinde olan akd-i nikâh şer‘an fesh-birle beynleri tefrîkine hükm-i şer‘î lâhık oldukdan sonra merkūme Fâtıma Hatun yine meclis-i şer‘de zevci muvâcehesinde mersûmun zimmetinde mütekarrir ve Yahûdiler âyîni üzere ma‘kūdun-aleyh olan iki bin üç yüz guruş mehr-i müeccel hakkımı mersûmdan taleb ederim deyü da‘vâ eylediğimde ol dahi ikrâr edüp lâkin bir vechile bana edâya kudreti olmamağla mehr-i mezkûrumdan mersûm Yohana Merkato Yahûdi ile iki yüz elli guruş üzerine bi’t-terâzî ba‘de akdi’l-musâlaha ve’l-kabûl ziyâdesi olan iki bin elli guruş mutâlebesine müte‘allika da‘vâdan mersûmun zimmetini kabûlünü hâvî ibrâ ve iskāt eyledim deyü ba‘de’l-ikrâr ve’t-tasdîk ibrâdan müstesnâ bedel-i sulh-i mezkûr iki yüz elli guruşun bi’t-taleb müdde‘iye-i mezbûreye edâsıyla mersûm Yohana Merkato Yahûdi ilzâm olunduğu İstanbul Mahkemesi’nden huzûr [-ı âlîlerine i‘lâm olundu.] Fî 26 Zilhicce sene 1236