İstanbul Mahkemesi 137 Numaralı Sicil (H.1236-1238 / M 1821-1822) cilt: 86, sayfa: 124 Hüküm no: 88 Orijinal metin no: [20a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sabuncu esnafının kefaletiyle Seyyid Ali Ağa’nın sabun dükkânının açılmasına müsaade edildiği Sabuncuyânın ta‘ahhüdü Ma‘rûz[-ı dâ‘î-i devlet-i aliyyeleridir ki] İstanbul’da Lanka Yenikapısı dâhilinde vâki‘ bâ‘isü’l-i‘lâm Sabuncu es-Seyyid Ali Ağa b. es-Seyyid Ali’nin bir bâb sabuncu dükkânı bâ-fermân sed olunan dekâkînden olmayup bundan akdem merkūm es-Seyyid Ali Ağa’ya âhar töhmet özrüyle dükkân-ı mezbûrun birkaç gün mesdûd kalmak içün tevzî‘i kat‘ olunup ve ilâ-hâze’l-ân sabun kılletine mebnî tevzî‘ verilmediğini ve merkūm es-Seyyid Ali Ağa kendi hâlinde ırzıyla mukayyed olduğunu esnâf-ı merkūme kethüdâsı el-Hâc Ahmed Ağa ve esnâfından Giridî Derviş Mehmed Ağa ve es-Seyyid Mehmed Ârif Ağa ve es-Seyyid Mustafa Ağa ve es-Seyyid el-Hâc Emrullah Ağa ve sâir mazbûtü’l-esâmî kimesneler huzûrumuzda ihbâr ve fîmâ ba‘d hilâf-ı rızâ-i âlî hareket etmeyeceğine tekeffül etmeleriyle merkūm es-Seyyid Ali Ağa’nın dükkân-ı mezkûru kemâ-fi’s-sâbık tevzî‘a idhâl olunduğu İstanbul Bâb mahkemesinden huzûr-ı âlîlerine i‘lâm olundu. Fî 27 Zilhicce sene 1236