İstanbul Mahkemesi 137 Numaralı Sicil (H.1236-1238 / M 1821-1822) cilt: 86, sayfa: 124 Hüküm no: 89 Orijinal metin no: [20a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ketânî Ömer Ağa b. İbrahim’in, Avanes v. Avanes aleyhine açtığı alacak davasında iddiasını ispat edemediği Mu‘ârazadan men‘ Ma‘rûz[-ı dâ‘î-i devlet-i aliyyeleridir ki] Sâhib-i arzuhâl Ketânî Ömer Ağa b. İbrahim meclis-i şer‘-i münîrde arzuhâlde ismi mastûr sarraf tâifesinden Andon oğlu Avanes v. Avanes nâm zimmî muvâcehesinde hâlâ Balçık kazâsında nâibü’ş-şer‘ olan Ahmed Reşid Efendi’nin sarraf-ı mersûma bin iki yüz otuz senesi Şa‘bânının on dokuzuncu günü ile müverrah bir kıt‘a deyn temessükü mantûkunca karzdan yedi yüz elli guruş deyni olup deyn-i nâib-i mûmâ-ileyhin umûrunu rü’yet eylediğimden nâib-i mûmâ-ileyhin bin iki yüz otuz beş senesi Zilka‘deti’ş-şerîfesinin on üçüncü günü ile müverrah bana vârid olan mektûbunda sarraf-ı mersûm meblağ-ı mezbûrun tahsîlini Silistre vâlisi hazretlerine ihâle etmiş meblağ-ı mezbûru Der-aliyye’de sen mersûm Avanes’e ver ve temessükü yedinden ahz eyle ba‘dehû ben sana bin guruş poliçe ederim deyü bana bi-şartü’r-rücû‘ emr eylediğine binâen ben mâlımdan sarraf-ı mersûma meblağ-ı mezbûr yedi yüz elli guruşu ol esnâda vermişdim lâkin nâib-i mûmâ-ileyh bir müddet sonra emrine nâdim olup bir akçe poliçe etmediğinden başka meblağ-ı mezbûr sarraf-ı mersûma benim deynim değildir verme deyü bana haber getirip deyn-i meblağ-ı mezbûru emr-i mezkûruna binâen sarraf-ı mersûma teslîmime nâdim olduğum ecilden meblağ-ı mezkûr yedi yüz elli guruşu sarraf-ı mersûmdan geri taleb ederim deyü takrîr-i meşrûhu üzere tasaddî eylediği da‘vâsını şer‘an mesmû‘a ve iltifâta şâyân olmayup müdde‘î-i merkūm meblağ-ı mezbûr yedi yüz elli guruşu da‘vâ-yı mezkûresiyle mersûm Avanes zimmîye bî-vech-i mu‘ârazadan men‘ olunduğu İstanbul Mahkemesi’nden huzûr-ı âlîlerine i‘lâm olundu. Fî-selh-i Zilhicce sene 1236