İstanbul Mahkemesi 137 Numaralı Sicil (H.1236-1238 / M 1821-1822) cilt: 86, sayfa: 125 Hüküm no: 90 Orijinal metin no: [20a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hamamcı Mehmed Ârif Ağa b. İbrahim’in kira meselesinde Hekim İsak v. Yanto ile sulh olduğu Mu‘ârazadan men‘ Ma‘rûz[-ı dâ‘î-i devlet-i aliyyeleridir ki] Merhûme Haseki Sultan vakfından İstanbul’da Ayasofya-i Kebîr Hamamı kurbünde vâki‘ ma‘lûmü’l-hudûd bir bâb menzil ve tahtında kâin bir bâb hekim dükkânının bâ-temessük-ı mütevellî bi’l-icâreteyn mutasarrıfı arzuhâlde mezkûrü’l-ism Hammâmî Mehmed Ârif Ağa b. el-Hâc İbrahim meclis-i şer‘-i münîrde dükkân-ı mezkûrun şehriye altı guruş kirâ ile müsteciri arzuhâl eden Hekim İsak v. Yanto Yahûdi muvâcehesinde mersûm İsak Yahûdi dükkân-ı mezkûrda vech-i muharrer üzere müşâhereten müstecirim olup mersûm ile işbu târih-i i‘lâm şehri gāyetine muzâfen fesh-i akd-i icâre etmemle mersûm İsak Yahûdi dükkân-ı mezkûru tahliye ve sene-i âtiye gurre-i Muharreminde bana teslîme ta‘ahhüd ettikden sonra mersûm İsak Yahûdi dükkân-ı mezkûru sene-i âtiye-i mezkûre Muharremi gurresinden on gün tamamına değin şehriye iki guruş kirâ ile mütemekkine olmak üzere istîcâra tâlib olmağla ben dahi dükkân-ı mezkûru gurre-i merkūmeden on gün tamamına değin Yahûdi-i mersûma iki guruş kirâ kavliyle îcâr ve teslîm eylediğimde ol dahi istîcâr ve tesellüm ve kabûl-birle dükkân-ı mezkûru şehr-i Muharrem-i mezkûrun onuncu günü hâliyeten bana teslîme ben dahi âhar temessük ile bi’l-icâreteyn mutasarrıf olduğum mahâll-i mezkûrda hamam-ı mezkûrun külhanı kapısına muttasıl bir bâb cerrah dükkânımı sene-i âtiye-i mezkûre Muharremi’l-harâmı gurresinden aded-i şehr beyân olunmaksızın beher şehr altı guruş kirâ tesmiyesiyle mersûm İsak Yahûdi’ye îcâr ve teslîm ol dahi ber-vech-i muharrer istîcâr ve tesellüm ve kabûl etmekle mâlından dükkân-ı evvel-i mezkûrda olan hekim gediği âlâtını işbu dükkâna nakl ve vaz‘a Yahûdi-i mersûma izin verüp mâlımdan dahi kendisine elli guruş teberru etmek üzere ve mesfûr İsak Yahûdi dükkân-ı mezkûrun kirâ-yı mezkûrunu bilâ-ezâ mâh be-mâh bana edâ ettikçe kendisini dükkân-ı mezkûrdan bilâ-mûceb ihrâc teklîfiyle rencîde etmemeğe rızâmla ta‘ahhüd edüp bu vechile kat‘-ı nizâ‘ eyledik dediğini mersûm İsak Yahûdi tasdîk eylediği İstanbul Mahkemesi’nden huzûr-ı âlîlerine i‘lâm olundu. Fî 27 Zilhicce sene 1236