İstanbul Mahkemesi 137 Numaralı Sicil (H.1236-1238 / M 1821-1822) cilt: 86, sayfa: 129 Hüküm no: 96 Orijinal metin no: [21a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Ağa vakfının mütevellîsi Mehmed Beyefendi ile kiracısı Seyyid Mehmed Ağa b. Ömer’in sulh olduğu Menzil damlalığı keşfi Ma‘rûz[-ı dâ‘î-i devlet-i aliyyeleridir ki] Sâdır olan fermân-ı âlîlerine imtisâlen zikri âtî husûsun mahallinde istimâ‘ [ve] fasl ü hasmı içün savb-ı şer‘-i enverden me’zûnen irsâl olunan Başkâtib Mevlânâ İbrahim Ârif Efendi hâssa mimarı hulefâsından Mustafa Seyyid ve Safi Mustafa halîfeler ile nezâret-i dâ‘îlerinde âsûde evkāfdan bevvâb-ı sultânîden ser-iskemleci-i hazret-i şehriyârî-i esbak merhûm el-Hâc Mehmed Ağa nâm sâhibü’l-hayrın İstanbul’da Kumkapı kurbünde Çadırcı Ahmed Çelebi Mahallesinde vâki‘ çeşme-i âb-ı lezîz ve hayrât-ı sâiresi vakfı müsakkafâtından mahrûse-i Galata’ya muzâfe kasaba-i Fındıklı’da Kabataş nâm mahalde İbrahim Efendi Mahallesinde Solak Çeşmesi nâm mahalde vâki‘ birbirine muttasıl iki bâb menzile varup Süheyl Bey Câmi‘-i şerîfi Hatibi Hâfız Mehmed Emin Efendi b. Süleyman ve Avni Efendi Câmi‘-i şerîfi imâmı Hâfız Mehmed Efendi b. Hâfız Mehmed ve Ayaspaşa Câmi‘-i şerîfi müezzini Mehmed Emin Efendi b. İsmail ve zü‘emadan es-Seyyid Yusuf Ağa b. Ali ve sâir mazbûtü’l-esâmî Müslimîn huzûrlarında ba‘de akdi’l-meclis vakf-ı mezbûrun bi’l-meşrûta mütevellîsi Hâfız Mehmed Beyefendi b. el-Hâc İbrahim nâm kimesne meclis-i ma‘kūd-ı mezkûrda vakf-ı mezbûr müsakkafâtından şehriye kırk beş akçe icâre-i müeccelelü ma‘lûmü’l-hudûd ve’l-müştemilât bir bâb menzil-i kebîre mutasarrıf olan sâhib-i arzuhâl otluk emini esbak es-Seyyid Mehmed Ağa b. es-Seyyid Ömer nâm kimesne hâzır olduğu hâlde mezbûrun câr-ı mülâsıkları olup derûn-ı arzuhâlde isimleri mezkûr li-ebeveyn er karındaşı ve vakf-ı mezbûr müsakkafâtından şehriye on akçe icâre-i müeccelelü kezâlik ma‘lûmü’l-hudûd ve’l-müştemilât bir bâb menzilin mutasarrıfı Çukadâr es-Seyyid Musa Ağa ile ittisâlinde kâin vakf-ı âhardan olan bir bâb menzilin mutasarrıfesi top ustası Süleyman Usta zevcesi demekle arîf zâtı mu‘arrefe Âişe bt. Mehmed nâm Hatun muvâcehelerinde işbu derûnlarında akd-i meclis-i şer‘-i âlî olan üç menâzil beynlerinde kâin mütevellîsi olduğum vakf-ı mezbûrdan olup fi’l-asl hâzır-ı mezbûr es-Seyyid Mehmed Ağa’nın tasarrufunda olan menzil bahçesinden müfrez eslâfım mütevellîler re’yleriyle otuz kırk sene ve beni ve kimesnenin taht-ı icâresinde olmayup evc-i menzil-i mezkûrun saçak ve duvar üzerinde olan kiremitlerin bârân vukū‘unda cereyân eden suların damlalık mahalli olmak üzere terk olunan mimârân-ı mezbûrân mesâhalarıyla on zirâ‘ sekiz parmak tûlünda ve bir zirâ‘ dokuz parmak arzında olan mahallin tûlen dokuz zirâ‘ mezbûr es-Seyyid Musa Ağa’nın menzili ittisâlinde olmağla mezbûr es-Seyyid Musa Ağa bu esnâda mahâll-i mezkûra bir kapı küşâd ve altı zirâ‘ sekiz parmak mahalli merkūme Âişe Hatun’un menzili verâsında olmağla mezbûre Âişe Hatun’un mahâll-i mezkûra duvarı olmayup ol vechile mezbûrân es-Seyyid Musa Ağa ve Âişe Hatun mahâll-i mezkûrları diledikleri gibi mutasarrıf ve hâzır-ı mezbûr es-Seyyid Mehmed Ağa’nın mutasarrıf olduğu menzili bahçesinde olan on zirâ‘ sekiz parmak tûlünde olan vakf-ı mezbûrun duvarını isti‘mâl etmeleriyle merkūm es-Seyyid Musa Ağa bu esnâda mutasarrıf olduğu menzilinden damlalık mahalline küşâd eylediği kapıyı sed ve bend ve mezbûre Âişe Hatun dahi mutasarrıf olduğu menzili verâsında duvar makāmında tahta perde vaz‘ ve mahâll-i mezkûru isti‘mâl etmemek üzere ve hâzır-ı mezbûr es-Seyyid Mehmed Ağa dahi zikr olunan damlalık mahallinin suyunu tarîk-i âm tarafına mukaddemâ inşâ eylediği arzen bir zirâ‘ dokuz parmak taş duvarın zemîninden künk ile tarîk-i âmm-ı mezkûra icrâ etmek üzere mezbûrûndan her birine tenbih olunmak bi’t-tevliye matlubumdur deyü dava ettikde mezbûr es-Seyyid Musa Ağa dahi bu esnâda küşâd eylediği kapı-yı mezkûru sedd ü bend ve mezbûre Âişe Hatun dahi mahâll-i mezkûra [21b] duvar makāmında tahta perde inşâ edüp hâzır-ı mezbûr es-Seyyid Mehmed Ağa’nın tasarrufunda olan menzili bahçesinin duvarını isti‘mâl etmemek üzere ta‘ahhüd eylediklerini hâzır-ı mezbûr es-Seyyid Mehmed Ağa dahi mârrü’l-beyân damlalık mahallinin cereyân eden suyunu duvar-ı mezkûr zemîninden tarîk-i âm icra etmek üzere müte‘ahhid olup bu vechile kat‘-ı münâza‘a eylediklerini mevlânâ-yı mezbûr dâ‘îleri mahallinde tahrîr ve ma‘an meb‘ûs ümenâ-i şer‘le meclis-i şer‘a gelüp alâ-vukū‘ihi inhâ ve takrîr eyledikleri İstanbul Mahkemesi’nden huzûr [-ı âlîlerine i‘lâm olundu.] Fî 22 Z sene 1236