İstanbul Mahkemesi 137 Numaralı Sicil (H.1236-1238 / M 1821-1822) cilt: 86, sayfa: 131 Hüküm no: 97 Orijinal metin no: [21b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bağdatlı Hacı Mehmed Emin Ağa ile Mehmed Salih ve Emine Hatun bt. Hüseyin’in alacak davasında birbirlerinin zimmetlerini ibrâ ettikleri 700 guruş üzerine kefâletden men‘ Ma‘rûz-ı dâ‘î-i devlet-i aliyyeleridir ki Mübârek rikāb-ı kamer-tâb-ı hüsrevâneye takdîm olunan işbu arzuhâlde zikr olunduğu üzere Bağdâd-ı Dârü’s-selâm ahâlîsinden olup bin iki yüz otuz dört senesi hılâlinde Anadolu’da Söğüd kasabasında müsafiren sâkin iken vefât eden Mecî?zâde Mehmed Said b. el-Hâc Mustafa’nın yanında mevcûde terekesi esmânı ve nukūdu olan cem‘an otuz dört bin dokuz yüz iki guruşu kasaba-i mezbûre vücûhundan el-Hâc İbrahim Ağa kıbel-i şer‘den vasî nasb olunduğuna binâen ba‘de’l-ahz meblağ-ı mezkûr bâ-fermân-ı âlî cânib-i mîrîden zabt-birle Bâb-ı Hümâyûn hazînesine naklolunduktan sonra müteveffâ-i merkūmun sulbî oğlu Kasım nâm kimesne müteveffâ-i mezbûrun verâseti zevcesi () hatun ile kendüye münhasıra olduğunu iddi‘â edüp ve merkūm Kasım müteveffâ-i merkūmun oğlu olduğu ber-nehc-i şer‘î sâbit olmağla meblağ-ı mezbûrun ancak nısfı olan on yedi bin dört yüz elli bir guruş merkūm Kasım’a cânib-i mîrîden teslîm olunmak bâbında fermân-ı âlîşân sâdır olmağla meblağ-ı mezbûr on yedi bin dört yüz elli bir guruş ma‘lûmü’l-esâmî kimesnelerden mâl-ı mîrîden olarak havâleten ahz olunmak üzere merkūm Kasım yedine yirmi iki kıt‘a ruznâmçe-i hümâyûn temessükâtı verilmiş olduğu arzuhâl-i mezkûr hâmişinde mastûr derkenârdan müstebân oldukdan sonra merkūm Kasım dahi vefât etmekle merkūm Kasım’ın li-ebeveyn ammi ve hasran vârisi olduğu bundan akdem mahzar-ı hasm-ı câhidde ber-nehc-i şer‘î sâbit olan sâhib-i arzuhâl Bağdâdî el-Hâc Mehmed Emin Ağa b. el-merkūm el-Hâc Mustafa bi’t-terâzî du‘âhânemizde meclis-i ma‘kūd ve meclis-i münîrde arzuhâlde mezkûrü’l-ism Bağdâdî Mehmed Salih b. Mehmed Emin mahzarında merkūm Mehmed Salih müteveffâ-i mezbûr Kasım’ın hayâtında ve umûrunu rü’yet etmek takrîbiyle meblağ-ı mezbûr on yedi bin dört yüz elli bir guruşun havâlât senedâtını merkūm Kasım’ın yedinden ba‘de’l-ahz meblağ-ı mezbûrun on iki kıt‘a senedât mantûkunca olan yedi bin sekiz yüz kırk guruşunu merkūm Kasım’ın tevkîliyle ahz edüp mâ‘adâ dokuz bin altı yüz on bir guruşu nâtık on kıt‘a temessükât yedinde kaldığına binâen el-ân tahsîl dâ‘iyesinde olup lâkin meblağ-ı mezkûr otuz dört bin dokuz yüz iki guruş bana mevrûs olup ve müteveffâ-i sâni-i merkūmun fevtiyle merkūm Mehmed Salih vekâletden mün‘azil olduğundan zikr olunan on iki kıt‘a havâlât senedâtı yedinde iken meblağ-ı mezkûr yedi bin sekiz yüz kırk guruşu tahsîl ve kabz etmekle meblağ-ı merkūmu bana teslîme merkūm Salih’e tenbîh olunması bi’l-verâse murâdımdır deyü da‘vâ eylediğimde ol dahi cevâbında meblağ-ı mezkûr yedi bin sekiz yüz kırk guruşu merkūm Kasım hayâtında mahallerinden kendisi cem‘ ve tahsîl edüp ben meblağ-ı mezkûr yedi [bin] sekiz yüz kırk guruşdan bir nesne kabz etmedim deyü ol mikdârı külliyen inkârından mâ‘adâ benim müteveffâ-i merkūm Kasım’ın hayâtında zimmetinde beher vakıyyesi yüz elli guruşa olmak üzere yedimden ve mâlımdan iştirâ ve kabz eylediği otuz vakıyye kırmız semeninden dört bin beş yüz guruş ve elli top damgahâne tâ‘bir olunur kumaş kıymetinden damânen iki bin guruş ve karzdan üç bin yüz on bir guruş ki cem‘an dokuz bin altı yüz on bir guruş alacak hakkım olmağla müteveffâ-i merkūm Kasım hayâtında meblağ-ı mezkûr dokuz bin altı yüz on bir guruş havâlâtı mahallerinden bana olan deyn-i mezkûruna mahsûben cem‘ ve tahsîl etmek üzere tarafeynden beni tevkîl edüp meblağ-ı mezkûr dokuz bin altı yüz on bir guruşu nâtık on kıt‘a temessükâtı yedime vermişdi deyü inkârıma mukārin ol mikdâr da‘vâ-yı deyn edüp ol vechile beynimizde ba‘de’l-münâza‘a bâ-tavassut-ı muslihîn beynimiz ıslâh olunup ben ammim oğlu olan müteveffâ-i merkūm Kasım’ın merkūm Mehmed Salih’e meblağ-ı mezkûr dokuz bin altı yüz on bir guruş cihât-ı mezkûrede zimmetinde deyni olup kable’l-edâ fevt olduğunu tâyi‘an ve kat‘iyyen ikrâr u i‘tirâf ve meblağ-ı mezkûr dokuz bin altı yüz on bir guruşu ve müteveffâ-i merkūm Kasım’da olan alacağına mahsûben mahallerinden kemâ-fi’s-sâbık ahza ben dahi tarafımdan merkūm Mehmed Salih’i tevkîl ve ihale eylediğimde ol dahi kabûl edüp ve kabzını iddi‘â eylediğim meblağ-ı merkūm yedi bin sekiz yüz kırk guruş müdde‘âmdan dahi merkūm Mehmed Salih ile kat‘an li’n-nizâ‘ an-inkâr üç bin iki yüz guruş üzerine ba‘de akdi’l-musâlaha ve’l-kabûl bedel-i sulh-i mezkûrun iki bin iki yüz elli guruşunu merkūm Mehmed Salih karzdan ol mikdâr medyûnesi olan benim zevcem hâzıratü bi’l-meclis zâtı mu‘arrefe Emine Hatun bt. Hüseyin üzerine beni cümlemizin kabûlümüze mukārin işbu meclis-i şer‘de havâle-i mukayyede ile havâle ve iki yüz elli guruşunu benim bundan akdem cânib-i Hicaz’dan Der-aliyye’ye getirdiğim emti‘anın resm-i gümrüğü içün İstanbul emti‘a gümrüğünde kabzına memûre benim bi-şartü’r-rücû‘ emrimle verdiği ol mikdâr guruşa [22a] mahsûben îfâ edüp ve yedi yüz guruşunu dahi nakden bana teslîme ta‘ahhüd edüp ve meblağ-ı mezkûr yedi yüz guruşa hâzır bi’l-meclis tüccârdan Bağdâdî el-Hâc Abdulkādir Ağa b. el-Hâc Salih tarafeynden bi’l-emr ve’l-kabûl kefîl ve dâmin olmağla meblağ-ı mezkûr yedi yüz guruştan mâ‘adâ ziyâdesine ve bi’l-cümle zikri mürûr eden husûslara müte‘allika âmme-i de‘âvî ve kâffe-i mutâlebâtdan tarafeynden her birimiz âharın zimmetini ibrâ-i âm ile kabûlü hâvî ibrâ ve iskāt edüp bu vechile kat‘-ı münâza‘a eyledik dediğini merkūm Mehmed Salih ve hâzır-ı mezbûre Emine Hatun’dan her biri bi’l-muvâcehe tasdîk eylediği İstanbul Mahkemesi’nden huzûr [-ı âlîlerine i‘lâm olundu.] Fî-gurreti M sene 1237