İstanbul Mahkemesi 137 Numaralı Sicil (H.1236-1238 / M 1821-1822) cilt: 86, sayfa: 133 Hüküm no: 98 Orijinal metin no: [22a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hâfız Abdülfettâh Efendi’nin, Seyyid Ebûbekir Ağa’ya olan borcunu ödemesi gerektiği Hüküm Ma‘rûz[-ı dâ‘î-i devlet-i aliyyeleridir ki] Attâr esnâfından bâ‘isü’l-i‘lâm Kemahlı es-Seyyid Ebûbekir Ağa b. es-Seyyid İbrahim nâm kimesne meclis-i şer‘-i münîrde yine esnâf-ı merkūmeden Hâfız Abdülfettâh Efendi b. Ömer nâm kimesne muvâcehesinde mezbûr Abdülfettâh Efendi zimmetinde bin iki yüz otuz üç senesi Recebinin beşinci günü târihiyle müverrah bir kıt‘a tahvîl mûcebince yedimden ve mâlımdan iştirâ ve kabz eylediği vezin ve fiyatı beynimizde ma‘lûm kahve semeninden bin guruş ve bâ-defter-i müfredât yine kahve semeninden üç bin beş yüz seksen bir guruş otuz iki para ki cem‘an dört bin beş yüz seksen bir guruş otuz iki para hakkımın yüz bir guruşunu bana edâ ve teslîm bâkīsi olan dört bin dört yüz seksen guruş otuz iki parayı merkūm Hâfız Abdülfettâh Efendi’den hâlâ taleb ederim deyü da‘vâ ettikte ol dahi cevâbında kaziyye minvâl-i meşrûh üzere olduğunu bi-tamâmihî tâyi‘an ve kat‘iyyen ikrâr u i‘tirâf etmeğin alâ-mûcebi ikrârihi meblağ-ı bâkī-i mezkûr dört bin dört yüz seksen guruş otuz iki paranın müdde‘î-i mezbûr es-Seyyid Ebûbekir Ağa’ya edâ ve teslîmiyle merkūm Hâfız Abdülfettâh Efendi ilzâm olunduğu İstanbul Mahkemesi’nden huzûr [-ı âlîlerine i‘lâm olundu.] Fî 2 M sene 1237