İstanbul Mahkemesi 137 Numaralı Sicil (H.1236-1238 / M 1821-1822) cilt: 86, sayfa: 133 Hüküm no: 99 Orijinal metin no: [22a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İstinyeli Şerbetçi Ömer Ağa b. Abdullah’ın vârislerinin diyet davasında Ahmed Beşe b. Mehmed ve diğerleriyle sulh olduğu Diyet da‘vâsından bin iki yüz guruşa sulh Ma‘rûz[-ı dâ‘î-i devlet-i aliyyeleridir ki] Dergâh-ı âlî yeniçerilerinin altmış dört cema‘at yoldaşlarından olup İstanbul’da Haydarpaşa Mahallesinde sâkin iken ber-vech-i âtî mecrûhan vefât eden İstinyeli Şerbetçi Ömer Ağa b. Abdullah’ın hasran vârisleri mu‘arrefeleri zevce-i menkûha-i metrûkesi Emine Hatun bt. Halil ile sulbiye kebîre kızı Hadice Hatun’dan her biri meclis-i şer‘-i münîrde on beşinci bölüğün yoldaşlarından Ahmed Beşe b. Mehmed tarafından husûs-ı âtîde tasdîka vekîli Mehmed Usta b. Osman ve kezâlik yetmiş beşinci cema‘at yoldaşlarından Salih b. diğer Mehmed tarafından tasdîka vekîli Salih Odabaşı b. diğer Osman ve kezâlik elli üçüncü bölüğün yoldaşlarından Derviş Alemdâr b. âhar Mehmed tarafından tasdîka vekîli Süleyman Usta b. Osman nâm kimesneler mahzarlarında müvekkilûn-ı merkūmûn sene-i sâbıkā Zilhiccesinin on altıncı günü akşamdan sonra sa‘at birde zikr olunan Haydarpaşa Câmi‘-i şerîfi önünde mûrisimiz müteveffâ-i mezbûru sağ memesi üzerine kama ile üçü darb ve cerh etmeleriyle ol anda mevrûsumuz müteveffâ-i mezbûr fevt olmağla mûceb-i şer‘îsini müvekkilûn-ı merkūmûndan bi’l-verâse taleb ederiz deyü da‘vâ sadedinde olmuşduk el-hâletü hâzihî beynimize muslihûn tavassutuyla da‘vâ-yı mezkûremizden müvekkilûn-ı mezbûrûn ile an inkâr bin iki yüz guruş bedel-i medfû‘ ve makbûza ba‘de’s-sulh ve’l-kabûl mûrisimiz müteveffâ-i mezbûrun dem ü diyetine ve bi’l-cümle husûs-ı mezkûra müte‘allika âmme-i de‘âvî ve kâffe-i mutâlebâtdan müvekkilûn-ı merkūmûnun zimmetlerini ibrâ-i âmm-ı sahîh-i şer‘î ile her birimiz bi’l-verâse ibrâ ve iskāt eylediğimizde onlar dahi ibrâ-i mezkûrumuzu kabûl eylediler deyü ikrâr ve tasdîkleri İstanbul Mahkemesi’nden huzûr [-ı âlîlerine i‘lâm olundu.] Fî 5 M sene 1237