İstanbul Mahkemesi 137 Numaralı Sicil (H.1236-1238 / M 1821-1822) cilt: 86, sayfa: 134 Hüküm no: 100 Orijinal metin no: [22a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Çelebi Fetolah v. Anton’un, Kanorta v. Menteş’e olan borcunun tecil edildiği Dokuz yüz üç guruşa hüküm Ma‘rûz[-ı dâ‘î-i devlet-i aliyyeleridir ki] Arzuhâl eden Kanorta v. Menteş Yahûdi meclis-i şer‘-i münîrde arzuhâlde mastûrü’l-ism Çelebi Fetolah v. Anton zimmî muvâcehesinde mersûm Fetolah zimmî zimmetinde yedime verdiği bir kıt‘a deyn temessükü mantûkunca bundan akdem yedimden ve mâlımdan iştirâ ve kabz eylediği mikdâr ve fiyatı beynimizde ma‘lûm ve sâir zümrüd semeninden on bir bin yedi yüz kırk üç buçuk guruşdan gayr-ez teslîmât sahhe’l-bâkī ikrârı mûcebince üç bin dokuz yüz üç guruş hakkım olup ve meblağ-ı bâkī-i mezkûr üç bin dokuz yüz on üç guruşdan mâ‘adâ benim mersûm Fetolah zimmî zimmetinde ve mersûm Fetolah zimmînin dahi benim zimmetimde bir akçe ve [bir] habbe hakkımız ve alacağımız olmamağla meblağ-ı bâkī-i mezbûr üç bin dokuz yüz on üç guruşa mâ‘adâ ve bi’l-cümle husûs-ı mezkûra ve işbu târih-i i‘lâma gelince sâir cemî‘ hukūk-ı şer‘iyyeye müte‘allika âmme-i da‘vâdan tarafeynden her birimiz âharın zimmetini ibrâ-i âm ile kabûlü hâvî ibrâ ve iskāt edüp ve meblağ-ı bâkī-i mezbûr üç bin dokuz yüz on üç guruş işbu târih-i i‘lâmdan otuz bir gün tamamında def‘aten bana edâ etmek üzere mersûm Fetolah zimmî istimhâl etmekle ben dahi bu vechile imhâl ve te’cîl eyledim dediğini mersûm Fetolah zimmî tasdîk ve meblağ-ı bâkī-i mezbûr üç bin dokuz yüz üç guruşu müddet-i mezkûre tamamında müdde‘î-i mersûma edâya ta‘ahhüd eylediği İstanbul Mahkemesi’nden huzûr [-ı âlîlerine i‘lâm olundu.] Fî 7 M sene 1237