İstanbul Mahkemesi 137 Numaralı Sicil (H.1236-1238 / M 1821-1822) cilt: 86, sayfa: 140 Hüküm no: 108 Orijinal metin no: [23b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefât eden Seyyid Mehmed Emin Ağa’nın değirmen ve fırın gediğinin, kızları Şerîfe Ayşe ve Şerîfe Emine Hanım’a intikali Değirmen ve fırın ferağı re’y-i mütevellî Ma‘rûz[-ı dâ‘î-i devlet-i aliyyeleridir ki] Arzuhâlde ismi mezkûr olup bundan akdem vefât eden sâbık peksimetçibaşı es-Seyyid Mehmed Emin Ağa b. Osman’ın sulbiye kızları olduklarını ve zikri âtî değirmen ve fırının doksan sehm i‘tibâriyle nısf hissesinin iki humsuna âdiyyen istihkāklarını iddi‘â edenler sâhibetey-i arzuhâlden zâtı mu‘arrefe Şerîfe Âişe Hanım li-eb kız karındaşı Şerîfe Hâce Emine Hanım tarafından husûs-ı âtîde vekîl-i müsecceli es-Seyyid Osman Ağa b. Osman hâzır olduğu hâlde meclis-i şer‘-i münîrde zîr-i nezâret-i dâ‘îlerinde olan evkāfdan merhûme Neslişah Sultan vakfından İstanbul’da Aksaray civârında Yusuf Paşa çeşmesi kurbünde vâki‘ dört yol ağzı fırını ve değirmeni demekle ma‘rûf ve ol vechile tahdîd ve tavsifden müstağnî şehriye yüz yetmiş akçe icâreli bir bâb değirmen ve fırının mecmû‘una el-yevm bâ-temessük-ı mütevellî bi’l-icâreteyn mutasarrıflar olmalarıyla vaz‘-ı yedleri mütehakkık olan Ömer Ağa b. İsmail ile gāibûn ani’l-beled Murad ve Mustafa ve Osman ve Kasım ve Yusuf ve Hüseyin ve Ahmed ve Hasan’dan arzuhâlde ismi mezkûr merkūm Ömer Ağa muvâcehesinde vakf-ı mezkûrun mütevellîsi Ahmed Efendi b. Mehmed Emin dahi hâzır olduğu hâlde sâbıku’l-beyân değirmen ve fırının nısf hisse-i şâyi‘ası müteveffâ-i merkūm peksimetçibaşı es-Seyyid Mehmed Emin Ağa zevceleri Adile Hanım ve Âişe Hanım’ın ve nısf hisse-i şâyi‘ası müteveffâ-i merkūmun bi’l-icâreteyn taht-ı tasarruflarında iken merkūme Âişe Hanım rub‘ hissesini bin iki yüz dokuz senesi hılâlinde Kuyumcu Sakaoğlu Karabet zimmîye ve merkūme Adile Hanım dahi rub‘ hissesini bin iki yüz on dokuz senesinde hâlâ Peksimetçibaşı el-Hâc Ahmed Ağa’ya kat‘iyyen fâriğler oldukları ve müteveffâ-i merkūm Peksimetçibaşı es-Seyyid Mehmed Emin Ağa’nın evlâdı defterî-i esbak merkūm es-Seyyid Feyzullah Efendi ve es-Seyyid Ahmed Bey ve es-Seyyid Mustafa Beyefendiler babaları müteveffâ-i merkūmun nısf hissesi müstakillen kendülere intikāl etmek üzere nısf hisse-i mezkûreyi zikr olunan bin iki yüz on dokuz senesi hılâlinde yine merkūm Peksimetçibaşı Ahmed Ağa’ya fâriğler olup ba‘dehû mesfûr Sakaoğlu Karabet zimmîye ferağ olunan rub‘ hisse-i mezkûre tedâvül-i eyâdî ile tasarruf olunarak ve üç hisse merkūm el-Hâc Ahmed Ağa ferağından el-yevm merkūmûn Ömer Ağa ve Murad ve Mustafa ve Osman ve Kasım ve Yusuf ve Hüseyin ve Ahmed ve Hasan uhdelerinde olduğu derkenârda ve mütevellî-i hâzır-ı merkūmun ve tarafeynin takrîr ve tasaddukundan zâhir ve nümâyân oldukdan sonra evvelâ merkūme Şerîfe Âişe Hanım b. müteveffâ-i merkūm Peksimetçibaşı es-Seyyid Mehmed Emin Ağa b. Ahmed b. Osman’ın firâşından hâsıla ve zevce Şerîfe Rukiye Hanım bt. Gümrükçü İshak Ağazâde es-Seyyid Mehmed Bey’den mütevellide sulbiye-i sahîha kızı olup sâlifü’z-zikr nısf değirmen ve fırının humus hissesi âdiyen bana intikāl etmişken li-eb karındaşlarım merkūmûn es-Seyyid Feyzullah Efendi ve es-Seyyid Ahmed ve es-Seyyid Mustafa Beylerin ferağları târihinde ben üç yaşında olup ve karındaşlarımın vâlideme adâvetleri olmak takrîbiyle ben kız karındaşları olduğumu ketm ederek nısf hisse-i mezkûre babalarından kendülere islâsen intikāl etmek üzere merkūm el-Hâc Ahmed Ağa’ya bâ-re’y-i mütevellî fâriğler olmalarıyla nısf hisse-i mezkûrenin bir humus hissesini babam müteveffâ-i merkūm es-Seyyid Mehmed Emin Ağa intikālden kānûn-ı pâdişahî üzere bâ-re’y-i mütevellî zabt ve tasarruf murâdımdır deyü iddi‘â ve sâniyen vekîl-i merkūm es-Seyyid Osman Ağa müvekkilesi merkūme Şerîfe Hâce Emine Hanım dahi müteveffâ-i merkūm Peksimetçibaşı es-Seyyid Mehmed Emin Ağa b. Ahmed b. Osman’ın firâşından hâsıla ve zevce Âişe Hanım bt. Abdullah’dan mütevellide sulbiye-i sahîha kızı olduğunu ve müvekkilesi merkūme dahi hîn-i ferağ-ı mezkûrda ketm olunmağla vech-i muharrer üzere müvekkile-i merkūmeye dahi gadr olunduğunu ve ol vechile müvekkilesi merkūmenin dahi nısf hisse-i mezkûrenin diğer bir humsuna âdiyen istihkākını vekâleten iddi‘â ve merkūm Ömer Ağa istintak olundukta cevâbında sâbıku’l-beyân değirmen ve fırına müşterikleri merkūmûn ile ma‘an bi’l-iştirâk bâ-temessük-ı mütevellî bi’l-icâreteyn mutasarrıf olmağla vaz‘-ı yedini mütevellî-i hâzır-ı merkūm tasdîkiyle ikrâr mâ‘adâyı ba‘de’l-inkâr müdde‘iyân-ı merkūman ber-vech-i muharrer müdde‘âlarına ikāmet eyledikleri değirmen ve fırın-ı mahdûd-ı mezkûru mahallinde dahi ta‘yîn ve irâe edüp lede’t-tezkiye adâletleri zahîre es-Seyyid Hasan Hoca b. es-Seyyid Süleyman ve Mehmed Necib Ağa b. Hâfız Mehmed Ali’den her biri merkūmetân Âişe Hanım ve Şerîfe Hâce Emine Hanım târih-i mezkûrdan mukaddem nısf-ı değirmen ve fırın-ı mahdûd-ı mezkûra mutasarrıf olan Peksimetçibaşı merkūm es-Seyyid Mehmed Emin Ağa b. Ahmed Ağa b. Osman’ın vech-i muharrer üzere zevceleri merkūmetân Şerîfe Rukiyye Hanım ve Âişe Hanımlardan mütevellideler sulbiye-i sahîha kızları olduğuna merkūm Ömer Ağa ile mütevellî-i hâzır-ı merkūm muvâcehelerinde edâ-yı şehâdet-i şer‘iyye etmeleriyle mûcebiyle ba‘de’l-hükm bu sûretle sâlifü’l-beyân değirmen ve fırının nısf hisse-i şâyi‘asının iki humsunu merkūmetân Şerîfe Âişe ve Şerîfe Hâce Emine Hanımların babaları müteveffâ-i merkūm Peksimetçibaşı es-Seyyid Mehmed Emin Ağa intikālından mütevellî-i hâzır-ı merkūm Ahmed Efendi re’yiyle zabt ve tasarrufları iktizâ eylediği İstanbul Mahkemesi’nden huzûr [-ı âlîlerine i‘lâm olundu.] Fî 24 Za sene 1236