İstanbul Mahkemesi 137 Numaralı Sicil (H.1236-1238 / M 1821-1822) cilt: 86, sayfa: 142 Hüküm no: 109 Orijinal metin no: [23b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hasköy’de Bostanî İbrahim Usta ismine kayıtlı berber dükkânının Hayrullah Usta b. Mehmed’e devredildiği Berber nakli gediği Ma‘rûz[-ı dâ‘î-i devlet-i aliyyeleridir ki] Sâhib-i arzuhâl berber esnâfından Hayrullah Usta b. Mehmed nâm kimesne meclis-i şer‘-i münîrde esnâf-ı merkūmenin kethüdâsı İbrahim Ağa ve şeyhleri es-Seyyid el-Hâc Osman Efendi ve yiğitbaşıları es-Seyyid Mehmed Nuri Ağa ve du‘âcıları el-Hâc Abdullah Efendi ve sâirleri hâzır oldukları hâlde derûn-ı arzuhâlde mastûr derkenâr nâtık olduğu üzere Hasköy kasabasında Pîrî Paşa’da Bostanî İbrahim Usta dükkânı demekle arîf bir bâb berber dükkânı derûnunda mevcûde başmuhâsebe kaleminde Bostanî İbrahim Usta ismine mukayyed beyne’l-esnâf berber gediği tâ‘bir olunur âlât-ı lâzıme-i ma‘lûme müstakillen yedimde şirâen mülküm olup lâkin gedik-i mezkûrun nakli lâzım gelmekle gedik-i mezkûr civârında Yenimahallede bostanî kolluğu kurbünde yağhâne karşısında vâki‘ bakkāl dükkânı ve Ermeni odaları beynlerinde kâin esnâfdan birinin gediğinden hâlî bâ-temessük-ı mütevellî bi’l-icâreteyn tasarrufumda olan bir bâb dükkânıma nakl ile mahâll-i evvelin kaleminden kaydı ref‘ ve terkīn ve mahâll-i sâni-i merkūmda kendi ismime tasrîhan kayd-birle yedime bir kıt‘a sûret i‘tâ olunmak murâdımdır deyü istid‘â ettikte fi’l-hakīka zikr olunan Bostanî İbrahim Usta ismine mukayyed olan gedik sâhib-i arzuhâl-i mezkûrun el-yevm yedinde şirâen mülkü ve sâlifü’l-beyân Yenimahallede vâki‘ bakkāl dükkânı ve Ermeni odaları [24a] beynlerinde olan dükkân-ı mezkûr esnâfdan birinin gediğinden hâlî olduğunu ve ber-vech-i meşrûh gedik nakli mer‘î ve mu‘teber şürût-ı nizâmlarından olduğunu esnâf-ı hâzirûn-ı merkūmûndan her biri haber vermeleriyle gedik-i evvel-i mezkûr Yenimahallede bostanî kolluğu kurbünde yağhâne karşısında vâki‘ bakkāl dükkânı ve Ermeni odaları beynlerinde kâin merkūm Hayrullah Usta’nın bâ-temessük-ı mütevellî tasarrufunda olan dükkân-ı mezkûra nakl ile mahâll-i evvelin kaydı ref‘ ve terkīn ve mahâll-i sâni-i merkūmda sâhib-i arzuhâl-i mezbûrun kendi ismine tasrîhan kaleminden yedine bir kıt‘a sûret verilmek iktizâ eylediği İstanbul Mahkemesi’nden huzûr-ı âlîlerine i‘lâm olundu. Fî 14 M sene 1237